«Aq jol» partiiasy Bas prokýratýraǵa jemqorlyq qarajattyń offshorlarǵa ketýin toqtatýǵa qatysty óz usynystaryn joldady, dep habarlaidy "Ult aqparat" partiianyń baspasóz qyzmetine silteme jasap.
Atalmysh depýtattyq saýaldy búgin Azat Perýashev málimdedi. Depýtattyń pikirinshe, «kúni búginge deiin Qazaqstannan syrtqa 167 mlrd dollardan astam qarajat shyǵarylǵan.» Bul - halyqaralyq sarapshylardyń anyqtaǵany.
Naqtylai aitsaq, «jemqorlardyń halyqtan urlaǵan somasy elimizdiń táýelsizdik jyldarynda munai satylymynan túsken Ulttyq qordaǵy qarajatynan eki ese kóp.»
Perýashevtiń aitýynsha, «Aq jol» fraktsiiasy 2012 jyldan bastap, halqymyzdan urlanǵan aqshasyna bailanysty kúresin toqtatqan joq. Partiia árdaiym ýákiletti organdardan urlanǵan milliardtardy Qazaqstanǵa qaitarý jumystaryn retteýdi talap etip keledi. Alaida bul talaptardyń nátijeleriniń ishindegi eń kórnekisi – jaqynda qaitarylǵan 180 mln. teńge, iaǵni jarty milliondai dollar. Munyń ózi nátije. Degenmen ony urlanǵan aqsha kólemimen salystyrýǵa múldem kelmeidi. Jáne bul protsestiń ary qarai jalǵasyp jatqanyn aitý kerek. Sebebi jeti jyl buryn dál osy sarapshylar memleketten 138 mlrd dollar shyǵaryldy dep jazǵan bolatyn».
«Sol sebepti, bizdiń aldymyzda urlanǵan aqshany qaitarý máselesi ǵana emes, syrtqa toqtaýsyz ketip jatqan zańsyz kapitaldyń oryn alýyna jol bermeý mindeti tur. Jemqorlar sottalǵan jaǵdaidyń ózinde, olar merzimnen buryn shartty bosatý arqyly bir-bir jarym jyldan soń bostandyqqa shyǵyp, ózderiniń kapitaldaryna qaita oralatynyna senedi», - deidi Azat Perýashev.
Perýashev: «Jemqorlardyń bul áreketin alǵash ret Batys elderi baiqaǵan bolatyn. Osyny eskerip, AQSh-tyń birneshe shtaty jemqorlyq boiynsha 10-15 jylǵa sottalǵan azamattardy merziminen buryn bosatýǵa tyiym salǵan. Dál osyndai zań Belarýs memleketinde de qabyldandy: «Jemqorlyq qylmystary úshin sottalǵan azamattardy merziminen buryn shartty túrde bosatýǵa nemese azamatqa zańda kózdelgennen jeńilirek jaza taǵaiyndaýǵa bolmaidy». Mundai zań jobasyn RF Memlekettik Dýmasy da engizdi. Urlanǵan aqshanyń somasy men bopsalaýshylyq týraly faktilerge qaramastan (múmkin solardyń arqasynda), tek Qazaqstan ǵana jariialy túrde uzaq merzimge sottalýshylardy birinshi múmkindik týǵan jaǵdaida esh aiǵai-shýsyz bostandyqqa shyǵarady. Qazaqstandyqtar ol týraly is bitken soń, BAQ-tan biledi», - deidi.
Osyǵan bailanysty, «Aq jol» fraktsiiasy sottalýshylardyń shartty túrde merziminen buryn bosatýyn boldyrmaý úshin qylmystyq zań normalaryna kelesini engizýdi talap etedi: shartty túrde merziminen buryn bosatý múmkindikterine jol bermeý jáne sottalýshylardyń urlanǵan qarajat somasyn tolyq ótemeiinshe, elden syrtqa shyǵýyna tyiym salý.
Depýtattyq saýal QR Premer-Ministri A.U. Maminge jáne QR Bas prokýrory Ǵ.D. Nurdáýletovke joldandy.
