Kóleńkeli ekonomikaǵa qarsy kúres aiasynda Almaty qalasynyń Medeý aýdanyndaǵy Memlekettik kirister basqarmasy jelilik biznes arqyly taýar satatyn tulǵalarmen jumys istep jatyr, dep habarlaidy QazAqparat tilshisi.
Basqarmanyń aitýynsha, jelilik biznestiń jyl saiynǵy álemdik ainalymy 1 milliard AQSh dollarynan asady. Qazaqstandyq naryqta da kóptegen sheteldik kompaniialar qandai da bir taýardy jelilik biznestiń kómegimen satady jáne salyq tólemeidi. Sonymen qatar, ónimniń sertifikattalýy - bólek áńgime.
«Áleýmettik jelilerdiń arqasynda mundai adamdardy anyqtaý ońai. Jelilik kompaniialardyń barlyq qyzmeti, oǵan tartylǵan adamdardyń aty-jóni, seminarlar ótetin oryndar, tabys tabatyn kóshbasshylar týraly barlyq aqparat áleýmettik jelilerde bar», - dep atap ótti MKB.
Basqarma monitoring tobynyń áleýmettik jelilerde jariialanǵan barlyq derekti taldap, tiisti salyqty tólegenin tekserý úshin salyq bazasyndaǵy málimettermen salystyratynyn jetkizdi. Ári qarai salyqtardy óndirý sharalary júrgiziledi.
Máselen, «ACCELER8» jáne «ELEV8» ónimderin satatyn BEPIC sheteldik kompaniiasy men onyń ókilderi tapqan tabystarynan salyq tólemeidi. Onyń kóshbasshylary aiynan 4 myńnan 40 myń dollarǵa deiin tabys tabatyndaryn áleýmettik jelide jariialaidy.
«On kún ishinde quqyqbuzýshylyqtardy ózdigimen sheshpegen jaǵdaida atalǵan kompaniia ókilderine qatysty salyqtyq tekserýler júrgiziledi», - dep eskertti salyq organy.
Salyq organynda tirkelmesten kásipkerlik nemese ózge de qyzmetti júzege asyrǵany úshin jeke tulǵalarǵa - 15 AEK, laýazymdy tulǵalarǵa, shaǵyn kásipkerlik sýbektilerine - 25 AEK kóleminde aiyppul, ákimshilik quqyqbuzýshylyq jasalǵan quraldar men múlikti tárkileý túrinde ákimshilik jaýapkershilik qarastyrylǵan.
«Jelilik biznestiń ókilderinen tutyný taýarlaryn satyp alǵanda satýshydan memlekettik tirkeý men jeke kásipkerlik týraly aqparatty jáne kassalyq chekti talap etý kerek. Osylaisha halyq kútpegen jaǵdailar bolǵanda ózin-ózi qorǵai alady», - dep atap ótti Memlekettik kirister basqarmasy.
