Túrmede otyrǵan Ózbekstannyń burynǵy prezidentiniń qyzy Gúlnár Kárimova týystaryna óleń jazyp jiberdi. Bul týraly onyń qyzy Iman Kárimova óziniń Instagram paraqshasynda habarlady, dep jazady Sputnik.
Imannyń aitýynsha, ol bostandyqqa shyqqan adamdar arqyly anasynan hat alǵan.
"Jýyrda túrmeden bosatylǵan óte batyl áielderdiń arqasynda biz anamyz týraly, onyń densaýlyǵy jaily biraz aqparat jáne osy óleń jazylǵan hatty aldyq. Ókinishke qarai, biz onymen habarlasa almai otyrmyz", - dep jazdy Ózbekstannyń eks-prezidentiniń jieni.
Onyń aitýynsha, Gúlnár Kárimovaǵa hat jiberýge, oǵan advokattardyń kirýine tyiym salynǵan, tipti telefonmen sóilesýge de ruqsat joq.
"Bul óleń onyń jan tolǵanysy men kóńil-kúiin beineleidi. Shyn máninde adamdardyń túrmede qandai jaǵdaimen betpe-bet keletinin elestetip, oilaýdyń ózi qorqynyshty", - dep atap ótti ol.
Gúlnár Kárimovanyń óleńinde rejim men tutqyndardyń bastan keshiretin azaptary sýrettelgen. Atap aitqanda, ol túrmede adamdar qorlanatynyn, olardyń janaiqaiyna eshkim qulaq aspaitynyn, satqyndyq jailaǵanyn jazǵan.
Ózbekstannyń eks-prezidenti Islam Kárimovtyń úlken qyzy jazasyn Tashkent mańyndaǵy №21 Zangiota áielder koloniiasynda ótep jatyr. Oǵan qarjy jymqyrdy, salyq tóleýden jaltardy, bopsalady jáne zańsyz jolmen tabylǵan aqshany zańdastyrdy degen aiyp taǵyldy.
Naýryzda Ózbekstannyń Joǵarǵy soty Gúlnár Kárimova uiymdasqan qylmystyq top quryp, bopsalaǵany jáne alaiaqtyq jasaǵany úshin 13 jyl 4 aiǵa bas bostandyǵynan aiyrylǵanyn habarlady.
