Jelide tarazdyq politseilerdiń pyshaqtasqan sáti túsirilgen video paida boldy, - dep habarlaidy "Ult aqparat" kaz.tengrinews.kz portalyna silteme jasap.
Rolikte úsh er adamnyń ózara janjaldasqany, keiin bireýiniń qalǵan ekeýge pyshaq sermegeni beinelengen.
Eske salaiyq, oqiǵa 2017 jyldyń 10 tamyzynda tańǵy 05:30-da "Arai-Plaza" meiramhanasynyń mańynda bolǵan. Keiin oqiǵanyń mán-jaiyn Jambyl oblysynyń prokýrorynyń mindetin atqarýshy Aidos Mailybaev aityp bergen edi. Onyń málimetinshe, bul videoda Jambyl oblystyq IID-niń Basqarma basshylary M.I.Úmbetáliev pen E.O.Bekturǵanov jáne Baizaq aýdandyq HQKO bólim basshysy M.Jetpisbaev beinelengen. Úmbetáliev Jetpisbaevqa pyshaq salǵan, keiin Bekturǵanovty da jaraqattaǵan. Jetpisbaev "diafragmanyń sol jaqta torokoabdemenaldyq úshkir qarýdan bolǵan jarasy jáne baýyrdyń sol jaq bóligi jaraqaty" diagnozymen aýrýhanaǵa jatqyzylǵan. Al Bekturǵanov aýrýhanaǵa jatýdan bas tartqan.
Bul derek Taraz qalalyq IIB-nyń sotqa deiingi tergeýlerdiń biryńǵai reestrinde QR Qylmystyq kodeksiniń 106-babynyń 1-bóligi boiynsha tirkeldi. Keiin oblystyq prokýratýra qylmystyq isti QR Qylmystyq kodeksiniń 24-babynyń 3-bóligi jáne 99-babynyń 2-bóliginiń 1-pýnktine almastyrdy. Osy qylmystyq is boiynsha Jambyl oblysy prokýratýrasynyń arnaiy prokýrorynyń basshylyǵymen vedomstvoaralyq jedel-tergeý toby quryldy. Kúdikti M.Úmbetálievtiń qaida ekeni anyqtalmady, ony ustaý úshin sharalar jalǵasyp jatyr.
