Qaznette Pfizer-BioNTech shyǵarǵan vaktsinanyń klinikalyq synaqtaryna qatysqan 270 júkti áieldiń bireýi ǵana deni saý bala týǵany týraly aqparat tarady. Qalǵandary túsik tastaǵan. Bul - jalǵan aqparat, dep habarlaidy stopfake.kz.
Bul aqparat osy jyldyń 19 qańtarynda Jeliniń aǵylshyn tildi segmentinde jariialanǵan maqalaǵa negizdelgen.
Onda 270 qatysýshynyń 238-i belgisiz sebeptermen synaqtan shyǵyp ketkeni, al qalǵan 32-niń bireýi ǵana saý balany dúniege ákelgen dep aitylǵan. Bul málimetterdi avtor Pfizer-BioNTech-tiń «5.3.6 2021 jylǵy 28 aqpanǵa deiin alynǵan PF-07302048 (bnt162b2) jaǵymsyz qubylystar týraly tirkeýden keiingi habarlamalarǵa jiyntyq taldaý» qujatynan alǵan.
Reuters portalynyń faktchekerleri Tehas ýniversitetiniń ońtústik-batys meditsinalyq ortalyǵyndaǵy Ana men bala meditsinasy kafedrasynyń dotsenti Emili Adhikarimen suhbattasty. Ol Pfizer-BioNTech-tiń túpnusqa qujatymen tanysyp, 238 qatysýshynyń synaqtan shyqpaǵanyn, áli de bala kóterip júrgenin, sondyqtan klinikalyq synaqtar kezinde júktiliktiń nátijesi týraly aita almaǵandaryn túsindirdi.
London Imperatorlyq kolledjiniń reprodýktivti immýnologiia pániniń oqytýshysy Vikki Male Reuters agenttigine maqalada aitylǵan jaǵymsyz áserler mindetti túrde vaktsinalarmen bailanysty bolmaitynyn aitty. Onyń sózinshe, maqalada sipattalǵan oqiǵalar vaktsinatsiiadan keiin bolǵan, biraq onyń saldary bolýy mindetti emes. Sondai-aq, ol maqalada egilgen áielder arasynda oryn alǵan 205 túsik tastaý jaǵdaiy týraly aitylǵanyn, bul AQSh-ta vaktsinatsiialanǵan júkti jáne bala emizetin áielderdiń az ǵana bóligin quraitynyn atap ótti.
Júkti áielder men bala emizetin analardy COVID-19 qarsy vaktsinatsiialaýdy bastamas buryn preparattar tolyq klinikalyq jáne klinikaǵa deiingi zertteýlerden ótti. Búgingi tańda bul protsedýra qaýipsiz jáne merziminen buryn bosaný nemese uryqtyń qaitys bolý qaýpin arttyrmaidy dep aitýǵa ǵylymi negiz jetkilikti.
Demek, Pfizer vaktsinasynyń klinikalyq zertteýleriniń barlyq qatysýshylary túsik tastady degen aqparat – feik jáne manipýliatsiia.
