Kúieýiniń qolynan qaza tapty delinetin Saltanat Núkenovanyń aǵasy qaiǵyly oqiǵa oryn alǵan meiramhanadaǵy baqylaý kameralaryna túsken kadrlardy jariialady. Ol muny Qýandyq Bishimbaevtyń advokattarynyń málimdemesine jaýap retinde shyǵarǵanyn aitady.
Qaryndasynyń ólimin egjei-tegjeili zerttep júrgen Aitbek Amangeldi “óziniń bul videony jelige eshqashan salǵysy kelmegenin, alaida Bishimbaevtyń zańgerleri basqa amal qaldyrmaǵanyn” aitady. Aitýynsha, video sol mekemedegi beinebaqylaý kameralaryna túsirilgen.
Kadrlardan er adamnyń áieldi uryp jerge qulatyp, judyryqpen soǵyp, tepkenin baiqaýǵa bolady. Núkenovanyń aǵasynyń aitýynsha, kadrlarda Bishimbaev pen onyń qaryndasy beinelengen.
Aitbek Amangeldi sondai-aq eks-ministrdiń advokattarynyń suhbatta aitqan sózderi ótirik ekenin jetkizdi.
"Meditsinalyq saraptamanyń qorytyndysy bar. Sarapshylar onyń basynan kem degende 13 ret soqqy alǵanyn anyqtady ", - dep jazady Núkenovanyń aǵasy.
Ol qolynda Bishimbaevtyń marqum áieline ártúrli dene bólikterine birneshe ret soqqy jasaǵany kórinetin birneshe rakýrstan túsirilgen videolardyń bar ekenin jetkizgen.
“Saltanattyń edende jatqan denesi kórinetin sýretter bar. Túni boiy aiqai men soqqynyń daýysyn estigen kýágerlerdiń aiǵaqtary bar”, – deidi Aitbek Amangeldi.
Buǵan deiin eks-ministr Qýandyq Bishimbaevtyń advokaty onyń áielin óltirgeni úshin kinásin moiyndamaityn málimdegen. Advokattyń dereginshe, Saltanat Núkenova sýbdýraldy gematomadan qaitys bolǵan. Al olardyń arasynda eshqandai jaljan bolmaǵanyn alǵa tartqan.
Burynǵy ministrdiń advokaty Nazken Qýsainova eks-ministrdiń munyń jazataiym oqiǵa ekenin jáne ol áielin áli jaqsy kórip, qaiǵyratynyn jetkizgen.
“Qýandyq Bishimbaev qatty kúizeliske tústi. Sebebi ol súiikti áielinen aiyrylyp qaldy. Sondyqtan ol jaýap berýge qatyspady. Bul qaiǵyly jaǵdai oǵan psihologiialyq turǵydan qatty áser etti. Qaiǵyly oqiǵa bolǵan kúnnen bastap 2 ai aralyǵynda eshqandai tergeýshige kýágerlik etpedi. Sonymen qatar ol óz kinásin moiyndamaidy", – dedi advokat Nazken Qýsainova.
