Boris Sartayev esimdi Facebook qoldanýshysy otbasylyq biýdjetke taldaý júrgizý týraly oqýshy qyzyna berilgen tapsyrmaǵa shúiligip, jazba qaldyrdy, dep habarlaidy "Ult aqparat".
Onyń jazýynsha, oqýlyqtaǵy tapsyrmada oqýshylarǵa ákesi men anasynyń tabysyn jazyp kelý talap etilgen.
«Myna qyzyqty kórip, tań-tamasha qalyp otyrmyn. Qyzym kelip, álemdi taný (ondai pán tórtinshi synypta bar) boiynsha tapsyrmaǵa kómektesip jiberýimdi ótindi. Uqpaǵan tusyn surady (...). Oqýlyqty jasaýshylar, sizder túnde salyq organdarynda jumys istep júrgen joqsyzdar ma? Myna suraqtyń siqyn qarańdar! Otbasylyq tabysty balalar arqyly bilip alý jón dep otyrsyńdar ma?» - dep jazady ashýly áke.
Áleýmettik jeli qoldanýshysy oqýlyqtaǵy tapsyrmany qupiia qyzmettiń jumysymen salystyrady.
«Men mundai oqýlyqtar men tapsyrmalarǵa qarsymyn! Álbette, tabysty jasyrý kerek degen paiym-pikirge súienip otyrǵan joqpyn. Bul zańsyz», - dedi ol.
Eske sala ketsek, keshe Parlament Májilisindegi Úkimet saǵatynda QR Bilim jáne ǵylym ministri Ashat Aimaǵambetov oqýlyq daiarlaý, taldaý sharalaryna syn aitylyp jatqanyn moiyndaǵan edi. Osy máselelerdi sheshý úshin qazirgi ýaqytta QR Bilim jáne ǵylym ministrligi oqýlyq sapasyn jaqsartý jáne saraptaý tetigin jańartý boiynsha jumys júrgizip jatyr. Sondai-aq avtorlar men sarapshylardy oqytý, oqýlyqtarǵa «jasyryn» sholý jasaý, sarapshylardy sertifikattaý uiymdastyrylady.
