Keshe, 22 qarashada Qazaqstanda koronavirýs juqqany arnaiy testpen rastalǵan 716 adam anyqtaldy. Bir kúnde 514 adam jazyldy.
Densaýlyq saqtaý ministrliginiń aqparaty boiynsha, jeksenbi kúni eń kóp naýqas Shyǵys Qazaqstan oblysynda (188) tirkelgen. Qazaqstannyń Reseimen shekaralas oblystarynda: Pavlodar (98), SQO (96), Qostanai oblystarynda (77) da naýqastardyń kóbeigeni baiqalady. Aqmola oblysynda – 61, Almaty qalasy men Batys Qazaqstan oblysynda árqaisynda - 42, Nur-Sultan qalasynda - 40, Qaraǵandy oblysynda - 20, Atyraý oblysynda - 15, Almaty oblysynda - 12, Jambyl oblysynda - 10, Aqtóbe oblysynda - 8, Shymkent qalasynda - 2, Mańǵystaý oblysynda - 2, Túrkistan oblysynda - 2, Qyzylorda oblysynda 1 adamnan koronavirýs tabylǵan.
Naýryz aiynan beri koronavirýs juqqany testpen dáleldengender 126 182 adamǵa jetti: 113 myńǵa jýyǵy jazylǵan, 1983-i qaitys bolǵan.
Qazaqstannyń koronavirýs statistikasyna koronavirýs pnevmoniiasyna shaldyqqandar esebi engizilmegen. 1 tamyzdan beri 41 159 adamǵa koronavirýs pnevmoniiasy diagnozy qoiylǵan, 427 adam qaitys bolǵan, 30 myńnan astamy jazylǵan.
Dúniejúzilik densaýlyq saqtaý uiymynyń koronavirýs kartasynda eki málimet (koronavirýs pen koronavirýs pnevmoniiasy esebi) qosylyp kórsetilgenmen Djons Hopkins ýniversiteti koronavirýs juqqany testpen dáleldengenderdi ǵana kartasyna engizip otyr. Qazaqstan biligi basynda bul eki málimetti biriktirip kórsetýge ýáde bergenmen oryndamady.
Qazaqstannyń koronavirýs statistikasyna Covid juqqan, biraq "ilespe aýrýdan qaitys boldy" delingen júzdegen adam ólimi de engizilmegen.
Keibir mamandar Qazaqstannyń resmi oryndary taratqan koronavirýs málimetke kúmánmen qaraidy. Táýelsiz zertteý júrgizgen Sandj zertteý uiymy "elde úsh millionnan astam adamǵa virýs juqqan" dep sanaidy.
