Jekpe-jekten keiin tóbeleske qatysqany úshin Habib Nýrmagomedov qana emes, onyń qarsylasy Konor Makgregor da jazalanýy múmkin. Nevada shtatynyń atletikalyq komissiiasy (NSAC) ótken demalysta T-Mobile Arena-da bolǵan oqiǵadan keiin qos faiterge de resmi shaǵym túsirmek, dep habarlaidy Sputnik ESPN basylymyna silteme jasap.
NSAC tóraǵasy Entoni Marneldyń aitýynsha, qazir komissiia Nýrmagomedov pen Makgregordyń kezdesýinen keiin shyqqan tóbelesti tolyǵymen tergep jatyr. Tergeý barysynda video muqiiat zerttelip, oqiǵaǵa qatysýshylardan jaýap alynady.
Sonymen birge tóbeleske qatysqan basqa da tulǵalar jaza tartýy múmkin – onyń ishinde segiz buryshqa shyǵyp Makgregordy birneshe ret urǵan "qyzyl jeide kigen adam" da bar.
"Oktagonǵa shyǵyp ketken kórermenge taǵylatyn aiyptaýlar bar. Onyń kim jáne qaida ekenin bilemiz. Tártip buzýshylyq jaiynda bas prokýrorǵa habarlaýym kerek. Bul kúrdeli oqiǵa, sondyqtan muqiiat tergelýi tiis", — deidi Marnell.
NSAC tóraǵasy habarlaǵandai, tártiptik tyńdaýlar qarashanyń sońyna deiin ótýi tiis.
Habib Nýrmagomedov pen Konor Makgregor arasyndaǵy jekpe-jek reseilik faiterdiń jeńisimen aiaqtaldy. Alaida kezdesý bite salysymen Nýrmagomedov oktagonnyń qorshaýynan asyp túsip, qarsylas komandanyń ókilderimen tóbelese bastady. Makgregor da sońynan umtylyp edi, ony eshkim jibermedi. Keiin irlandyq faiter alańda Nýrmagomedovtiń komandasyndaǵy adamdarmen judyryqtasty.
Jekpe-jekten keiingi baspasóz máslihatynda Habib Nýrmagomedov óz qylyǵy úshin keshirim suraǵan.
