Jeke tulǵalardyń bankrottyǵyn retteitin zań jobasyn tanystyrǵan Memlekettik kirister komiteti tóraǵasynyń orynbasary Qairat Miiatov jalǵyz baspanany qai jaǵdaida bank alyp qoia alatynyn túsindirdi, dep habarlaidy QazAqparat.
«Somasy 4,9 mln teńgeden asatyn boryshtardyń barlyǵy boiynsha azamattar sot arqyly bankrottyq rásimdei alady. Bul rásim barysynda boryshkerdiń múlki saýda-sattyqta satylýy múmkin. Zańnyń mańyzdy tustarynyń biri osy. Sondyqtan da bul sot bankrottyq sot arqyly rásimdeledi. Ár másele sotta tyńǵylyqty qaralýy kerek. Túsken qarajat kreditorlarǵa kezektilik boiynsha óteýge jiberiledi», - dedi Qairat Miiatov.
Zań jobasyndaǵy jalǵyz baspanany alyp qoiý máselesi Úkimetke ózgerissiz jiberilgeni atap ótildi.
«Jalǵyz baspana kepilge qoiylǵan bolsa, kreditor ony sot bankrottyǵy barysynda alyp qoiýǵa quqyly bolady. Eger jalǵyz baspana kepil bolmasa, kreditorlar oǵan ótinish bere almaidy. Qalǵan ótelmegen soma boryshker múlki bar ekenin jasyryp, jalǵan aqparat bermegen bolsa, esepten shyǵarýǵa jatady.
Alaida, aliment jáne basqa adamnyń ómiri men densaýlyǵyna keltirilgen zalal boiynsha qaryzdar esepten shyǵarýǵa jatpaidy», - dedi Memlekettik kirister komiteti tóraǵasynyń orynbasary.
