Elimizde jeke sot oryndaýshylaryna qosymsha ókilettik berilmek. Bul týraly búgin Májilistegi Úkimet saǵatynda Ádilet ministri Qanat Mýsin aitty, dep habarlaidy QazAqparat.
«Búginde aliment tóleýshini ákimshilik jaýapkershilikke tartý úshin oǵan hattama toltyrý qajet. Jeke sot oryndaýshysynda mundai quqyq joq. Bul úshin ol boryshkerdi ádilet organdaryna alyp kelip, ol jerde ádilet organdarynyń laýzymdy tulǵasy tiisti ákimshilik hattama toltyrady. Bul rette boryshker barǵysy kelmese, onda ony politsiia ǵana májbúrlep apara alady», - dedi ministr.
Onyń atap ótýinshe, osy jaitqa bailanysty boryshker adamdy jaýapkershilikke tartý uzaq ýaqytty alyp jatady.
«Eger zańnamada jeke sot oryndaýshysyna ákimshilik hattama toltyrý quqyǵy beriletin bolsa, onda bul zań buzýshylar sanyn eselep qysqartyp, olardy tez jazalaýǵa septigin tigizer edi. Sol arqyly boryshty óteýge múmkindik beredi. Qazirgi ýaqytta atqarýshylyq óndiris týraly jańa zań tujyrymdamasyn ázirlep jatyrmyz. Onda sot oryndaýshylaryna dál osyndai ókilettik engizemiz. Óitkeni, bul – problemany sheshýdiń tiimdi quraldarynyń biri. Tolyqtai alǵanda, oblys ákimdikterimen memorandým jasalyp,bos jumys oryndary jármeńkesi turaqty ótkiziledi. Olarǵa jumysy joq boryshkerlerdiń kelýin qamtamasyz etýge tyrysamyz. Ótken jyly alient boiynsha bereshegi 2,5 myń boryshkerdi jumysqa ornalastyrdyq. Tipti áleýmettik jumystar ótkizýge de tyrysamyz», - dedi Qanat Mýsin.
