Elordanyń jeke sektorda turatyn tutynýshylary úilerine tabiǵi gazdy birtindep kirgizip jatyr. Bul týraly búgin Úkimet otyrysynda Nur-Sultan qalasynyń ákimi Altai Kólginov aitty, dep habarlaidy QazAqparat tilshisi.
«Jeke sektorda turatyn tutynýshylar úiine tabiǵi gazdy birtindep kirgizip jatyr. Qazirgi kúni 5 myńnan astam úi gazben jabdyqtaý júiesimen qamtylǵan. Jyl sońyna deiin 6 myń tutynýshyǵa jetkizýdi josparlap otyrmyz. Jeke sektorlardaǵy úilerge esepke alý qurylǵylary tegin qarastyrylǵan. Front-keńseler jumys isteýde. Onda 3 myńnan astam turǵyn gazdy qosý joldary, tehnikalyq qaýipsizdik máseleleri jáne basqa da suraqtar boiynsha keńes aldy. Bul jumys qazirgi kúni ary qarai jalǵasyp jatyr», - dedi elorda ákimi.
Sonymen qatar qala basshysy JES-1, JES-2-de qurylǵylardy almastyrý, jeldetkish jáne qorǵaý júielerin ornatý siiaqty jumystar júrgizilip jatqanyn aitty.
«Nátijesinde sý jylytatyn 4 qazandyqqa gaz qosyldy. Qazirgi ýaqytta qalǵan qazandyqtardy gazǵa almastyrý jumystary jalǵasýda. Sonymen qatar qazandyqtary avtonomdy túrde jumys isteitin mektep, balabaqsha, aýrýhana siiaqty 19 áleýmettik nysandy gazǵa kóshirý jumystary júrgizilý ústinde. Jalpy, gazdandyrý jobasy ekologiiany jaqsartyp qana qoimai adamdardyń densaýlyǵyna da oń áserin tigizip, jeke sektorda turatyn elorda turǵyndaryna qolaily jaǵdai týǵyzady degen senimdemiz»,- dedi Altai Kólginov.
