Elordalyq jeke kásipkerler de jumys isteitin jastarǵa arnalǵan jaldamaly páterler salýǵa niet tanytyp otyr. Bul týraly búgin Ortalyq kommýnikatsiialar qyzmetindegi baspasóz máslihatynda Nur-Sultan qalasynyń ákimi Altai Kólginov aitty, dep habarlaidy QazAqparat.
«Prezidenttiń tapsyrmasyna sáikes, úsh iri qalada jumys isteitin jastarǵa 1 myń páterden berý tapsyrmasy bar. Sonyń 1 050-iniń kiltin tabystadyq. Baiqaý jariialaǵanmyzda 6 500 adam qujatyn tapsyrdy. Iaǵni, suranys 6 ese kóp. Sondyqtan kelesi jyly muny jalǵastyratyn bolamyz», - dedi Altai Kólginov.
Onyń aitýynsha, elordalyq jeke kásipkerler de qala ákimdigi jer beretin bolsa jastarǵa jaldamaly páterlerdi óz qarajatyna salýǵa qulshynys tanytýda.
«Qazir kásipkerler de kelip jatyr. Olar 1 myń orynǵa 6 500 adamnyń ótinish bergendigin, ákimdik jerge kómektesse óz investitsiialarynyń esebinen úi salyp bere alatyndyqtaryn aityp otyr. Bul bizdi qýantady, qoldaimyz. Biraq, biýdjetten de toqtatpaimyz. Iaǵni, jyl saiyn osynsha páter salý josparda bar. Biraq, túsiný kerek, ol bir jylda sheshilmeidi. Bizde 29 jasqa deiingi jastar sany resmi túrde 245 myń adamdy quraidy. Biraq olardyń bárin pátersiz dep aitýǵa bolmaidy. Degenmen, bul másele baqylaýda. Ásirese, jastarǵa múmkinshilik ashý kerek», - dedi elorda ákimi.
