Qyrǵyzstan prezidenti Sooronbai Jeenbekov elde radikaldyq dini aǵymdarǵa balama retinde "ata-babadan qalǵan dástúrli islam qundylyqtaryn" nasihattaý keregin málimdedi. Onyń sózinshe, súnnittik hanafi mazhabyn "beibitshilik, tózimdilik, izgilik pen ónegeliliktiń dini" retinde qoldasa, Qyrǵyzstan halqynyń birligi nyǵaia túsedi.
"Bizde din salasy tolyq erkin dep jariialanǵan. Osy erkindiktiń arqasynda bizde túpki maqsaty kópshilikke belgisiz túrli dini aǵymdar, sektalar, mazhabtar men tariqattar qaptady" dedi Bishkekte "Zamanaýi memlekettegi islam" dep atalatyn II-halyqaralyq konferentsiiada sóilegen Jeenbekov.
Prezident sonymen birge Qyrǵyzstanda memleket dinge beitarap ustanymda ekenin, eshqandai dinge basymdyq bermeitinin jáne azamattarǵa eshqandai dini ideologiiany tańbaitynyn aitty.
"Ár adam dinge qalai qaraimyn dese de ózi biledi. Eshkimniń óz dúnietanymyn basqalarǵa tańýǵa haqy joq. Memleket te tańbaýy tiis. Budan ózge, memleket din salasynda ár adamnyń din ustaný erkindigin qorǵaýy tiis" dedi Qyrǵyzstan prezidenti.
Qyrǵyzstan biliginiń dereginshe, sońǵy jyldary 500-ge tarta qyrǵyz azamaty Siriia men Iraktaǵy "Islam memleketi" ekstremistik uiymy men basqa da terrorlyq toptarǵa qosylǵan.
