Qyrǵyz Respýblikasynyń Prezidenti Sooronbai Jeenbekov búgin eldegi saiasi jaǵdaiǵa bailanysty qyrǵyzstandyqtarǵa kezekti málimdeme jasady, dep habarlaidy "Ult aqparat" Qyrǵystan Prezidentiniń resmi saityna silteme jasap.
Memleket basshysy málimdemesiniń mátini tómende keltirilgen:
«Qurmetti otandastar!
Eldegi saiasi jaǵdai shielenisip ketti.
Bul jaǵdaidy retteý úshin biz mynadai qadamdar jasaýǵa tiispiz.
Jogorký Keneshti sailaý nátijeleri joiyldy. Endi jańa parlament sailaýy taǵaiyndalýy kerek. Bul týraly sheshimdi OSK qabyldaidy. Bul sharalar qazirgi saiasi shielenisti jeńildetedi.
Sonymen qatar, daǵdarysqa deiin jumys istegen Premer-Ministr men Úkimet múshelerin otstavkaǵa jiberý qajet, bul jańa taǵaiyndaýlarǵa zańdy negiz bolady. Jańa Premer-Ministr men Úkimet múshelerin taǵaiyndaýdy zańdastyrý úshin Jogorký Keneshtiń qaýlysy men Prezidenttiń Jarlyǵy qajet. Men tiisti Jarlyqtarǵa qol qoiýǵa daiynmyn, Jogorký Keneshtiń qaýlylaryn kútemin.
Parlament músheleri óz mindetterin oryndaýy úshin quqyq qorǵaý organdary Jogorký Kenesh depýtattarynyń qaýipsizdigin qamtamasyz etýi tiis.
Qymbatty otandastar! Buǵan deiin aitqanymdai, men bolyp jatqan kadrlyq ózgeristerdi zańdastyrýǵa niettimin. Men úshin eshqandai laýazym memlekettiń tutastyǵynan, halyqtyń birligi men qoǵamnyń tynyshtyǵynan joǵary emes.
Biz qazirgi jaǵdaidy múmkindiginshe tezirek quqyqtyq qalypqa qaitarýymyz kerek. Atqarýshy bilik organdarynyń zańdy basshylary bekitilgennen keiin jáne elde zań ústemdik qurǵannan keiin Qyrǵyz Respýblikasynyń Prezidenti qyzmetinen ketýge daiynmyn.
Barlyq saiasi kúshti eldegi beibitshilik pen tynyshtyqty saqtaýǵa, halyqty bólmeýge jáne qoǵamda bólinbeýge shaqyramyn. Jaratqan Ie barlyq saiasi kúshke danalyq pen shydamdylyq bersin!».
