Qazaqstan Jazýshylar Odaǵy basqarmasynyń tóraǵasy, aqyn Ulyqbek Esdáýlet 7 maýsym kúni alashtyń rýhani astanasy – Semei qalasynyń ziialy qaýym ókilderimen, shyǵarmashylyq jastarmen kezdesti.
Belgili qalamger Medeý Sárseke, Jazýshylar Odaǵynyń Shyǵys Qazaqstan oblystyq filialynyń jetekshisi, aqyn Álibek Qańtarbaev, qoǵam qairatkeri Túsiphan Túsipbekov qatysqan kezdesýde U.Esdáýlet shahardaǵy ziialy qaýymǵa Odaqtyń qolǵa alyp jatqan jumystaryn, aldaǵy josparlaryn tanystyrdy. Búginde Odaqtaǵy 800-den astam jazýshynyń 500-i zeinetker ekendigin, sondyqtan uiymǵa talantty jastardy múshelikke alý jaǵyna kóńil bólinip jatqandyǵyn aita kelip, semeilik jas aqyn Merei Qartovqa Jazýshylar Odaǵynyń múshelik biletin tabys etti.
Jazýshylar Odaǵynyń Semei qalalyq filialyn kóp jyldar kórnekti abaitanýshy Tóken Ibragimov basqarǵany belgili. Jiynda osy filialdy jandandyrý, oǵan jańa basshy taǵaiyndaý jaiynda da sóz qozǵalyp, qazaqtyń talantty aqyny Tynyshtyqbek Ábdikákimov, dramatýrg Aibek Sapyshev filial jetekshiligine jas aqyn Merei Qartovtyń kandidatýrasyn usyndy. Basqarma tóraǵasy Ulyqbek Esdáýlet elimizdiń birneshe oblystarynda Odaq filialdarynyń basshylary óz tilekterimen aýystyrylyp jatqanyna toqtalyp, Semei qalalyq filialynyń jetekshisine qatysty usynysty qoldaityndyǵyn jetkizdi.
Basqosýda sóz alǵan filologiia ǵylymdarynyń doktory Arap Espenbetov: «Semeide Jazýshylar Odaǵynyń filialy bolýy kerek degenge durys qaraimyn. Dástúrli jer ǵoi bul. Sabaqtastyq úzile qoimas. Qalada talantty jastar az emes. Olardyń kitaptaryn shyǵaryp, Jazýshylar Odaǵyna múshelikke ótýlerine qolǵabys jasaǵanymyz jón. Qazirgi jaǵdai neni kórsetedi? «Men jazýshymyn» degennen eshteńe shyqpaidy. Qazir uiymdastyrýshy kerek. Jazýshyǵa jaǵdai jasaityn adam kerek. Menedjer kerek» dei kele, Semeide qolǵa alynyp jatqan «Abai álemi» atty kitaptar seriiasynyń bir kitabyna talantty jastardyń dúnieleri toptastyryp berilse degen usynysyn alǵa tartty.
Shyǵys Qazaqstanǵa jumys saparymen kelgen Qazaqstan Jazýshylar Odaǵy basqarmasynyń tóraǵasy Ulyqbek Esdáýletti 8 maýsymda Semei qalasynyń ákimi Ermak Sálimov arnaiy qabyldady. Kezdesýde U.Esdáýlet Odaqtyń Semeidegi filialynyń jańa basshysy Merei Qartovty ákimge tanystyrdy. E.Sálimov filialǵa qoldan kelgen kómegin aiamaitynyn tilge tiek etti. Kezdesý barysynda osyndaǵy Abai mýzeiiniń direktory Bolat Júnisbekov filialǵa mýzei ishinen konferentsiia zaly bar jaily da qolaily oryn berýge ázir ekendigin, al Shákárim ýniversitetiniń basshylyǵy filialdy qajetti jabdyqtarmen jabdyqtaýǵa járdemdesetinin aitty.
Reti kelgende aita keteiik, 7 maýsymda Semeidegi Shákárim atyndaǵy ýniversitette Ulyqbek Esdáýlettiń «Aqqý syr, qaýyrsyn naz, qanatty óleń» atty jastarmen kezdesý keshi ótip, kesh aiasynda oqý orynyń rektory Meiir Eskendirovtiń uiǵarymymen biyl mektep bitirgen úsh talantty jasqa aqyn atyndaǵy bilim granty saltanatty túrde tapsyryldy.
A.Ábil
