Jazýshy, kinodramatýrg, Qazaqstan Jazýshylar odaǵynyń múshesi, Qazaqstannyń eńbek sińirgen qairatkeri Smaǵul Elýbai almatylyqtardy engizilgen jeńildetýlerge qaramastan, sanitarlyq talaptardy saqtaýdy jalǵastyrýǵa jáne jaqyn jandarǵa qamqor bolýǵa shaqyrdy, dep habarlaidy QazAqparat.
«Qazaqstanda indettiń taraý qarqyny báseńsidi. Bul jaǵdai eńsemizdi kóterip, úmitimizge úmit jalǵady. Indettiń taraý aýqymy tarylyp keledi. Osy baǵytta Úkimet, ákimdikter, dárigerler úlken jumys atqardy, aqparat quraldary arqyly nasihat júrgizildi. Indetti birjolata qurtýǵa az ýaqyt qaldy dep oilaimyn. Almatylyqtardy osy indetti birjolǵa jeńýge azǵantai ýaqyt qalǵanda bosańsymaýǵa shaqyramyn. Eń bastysy – bosańsymaý kerek!», – deidi Smaǵul Elýbai.
Sonymen qatar, ol ózge de saqtyq sharalaryn ustanyp, halyq kóp jinalatyn oryndarǵa barmaý kerektigin aitty. Bul sharalar jaqyn adamdardyń ómirin saqtaýǵa múmkindik beredi.
Aita keteiik, memlekettik komissiianyń sheshimimen 17 tamyzdan bastap, Qazaqstanda karantin sharalaryn kezeń-kezeńimen alyp tastaý jospary bekitilgen bolatyn.
