Aýyl sharýashylyǵy vitse-ministri Rústem Qurmanov sharýa qojalyqtardyń atyna tirkelgen 72,4 mln ga jaiylym jerdiń jartysyna jýyǵy ǵana igerilip otyrǵanyn aitty, dep habarlaidy QazAqparat.
«Prezidenttiń tapsyrmasy boiynsha óńirlerde paidalanylmai jatqan jaiylymdyq jerdiń kólemderi anyqtalyp jatyr. 2019 jyldyń qarasha aiynda ministrlik aýyl turǵyndaryna arnalǵan men aýyl sharýashylyǵy salasyndaǵy kásiporyndardyń atyna tirkelgen jaiylym jerlerge jiti taldaý jumystaryn aiaqtaǵan edi. Aýdandar men aýyldyq okrýgterdegi jaiylymǵa túsetin normativti júktemeler mal sanymen salystyra esepteldi», - dedi Rústem Qurmanov aýyl sharýashylyǵy ministrliginiń alqa májilisinde.
Taldaý jumystary kórsetkendei, búkil oblystaǵy qarapaiym halyq úshin, ásirese ońtústiktegi óńirlerde jaiylym jerdiń jetispeitini anyqtalyp otyr. Onyń ústine qazirgi sharýa qojalyqtardyń atyna tirkelgen 72,4 mln ga aýmaqtyń jartysyna jýyǵy mal basynyń jetkilikti sanymen qamtylmaǵan.
«Osyǵan bailanysty ministrlik halyqqa jaiylym jerdi bólý boiynsha oblys ákimderiniń atyna tiisti hattardy joldady. Nátije de bar. Jyl basynan beri memlekettiń menshigine 1,8 mln ga jaiylym jer qaitaryldy. Bul baǵyttaǵy jumys jalǵasyn tabady», - dedi vitse-ministr.
Sonymen qatar 2019 jyly AShM jer resýrstaryn basqarý boiynsha komitet jer zańnamasynyń saqtalýyn qadaǵalaý jumystary aiasynda sot arqyly memleket menshigine paidalanylmai jatqan 1,2 mln ga jerdi, 37 myń ga egindik alqabyn, 1163 myń ga jaiylym jerdi qaitarǵan.
«Atalǵan jerdi jańa jer paidalanýshylarǵa taratyp, aýyl sharýashylyǵy ainalymyna engizý jumysy jalǵasýda», - dedi ol.
Eske sala ketsek, buǵan deiin Aýyl sharýashylyǵy vitse-ministri Rústem Qurmanov Soltústik Qazaqstan men Aqmola oblystaryndaǵy paidalanylmai jatqan jerge ǵarysh arqyly júrgizilgen aýdittiń qorytyndysyn jariialap, bul jumys biyl basqa oblystarda jalǵasatynyn málim etken edi.
