QR Memlekettik qyzmet isteri agenttiginiń tóraiymy Anar Jaiylǵanova «Memlekettik qyzmetke ornalasý erejelerine» engizilgen birqatar túzetýlerdi túsindirdi, dep habarlaidy "Ult aqparat".
«Azamattardyń memlekettik qyzmetke ornalasý úderisin jeńildetý jáne konkýrstardy barynsha ashyq ótkizý úshin agenttiktiń bastamasymen «Memlekettik qyzmetke ornalasý erejelerine» bir qatar ózgerister engizildi. Birinshiden, qoldanystaǵy erejeler boiynsha úmitkerler baiqaýlarǵa qajettilikke qarai úiden shyqpai-aq qatysa alady. Ol úshin qujattardy elektrondyq poshta arqyly tapsyrýǵa múmkindik berildi. Iaǵni buryn talap etilgendei, memlekettik organǵa qujattardyń qaǵaz nusqalaryn ákelý qajettiligi joiyldy. Sonymen qatar, áńgimelesýden ótý úshin kandidattyń memlekettik organǵa kelýi qajet emes. Osylaisha, túzetýlerge sáikes áńgimelesý qashyqtyqtan beine bailanys quraldary arqyly júrgizilýi múmkin», - dep jazdy agenttik basshysy Facebook paraqshasynda.
Onyń atap ótýinshe, ekinshiden, buryn memlekettik qyzmetke ornalasý konkýrsyna qatysý úshin úmitkerler konkýrs qorytyndysyna qaramastan tolyq qujattar tizimin daiyndaý qajet bolatyn. Endi konkýrsqa qatysý úshin úmitkerler óz ótinishine tek eki qujatty: diplomnyń kóshirmesin jáne qyzmettik tizimniń kóshirmesin qosa usynady. Qalǵan talap etiletin qujattardy konkýrstyq komissiianyń oń sheshimin alǵan kandidat ǵana tapsyrady.
«Úshinshiden, agenttik konkýrstyq rásimderdiń ashyqtyǵyn odan ári arttyrýǵa baǵyttalǵan túzetýler qabyldady. Osylaisha, sońǵy túzetýlerge sáikes, konkýrsqa qatysa alatyn áleýetti baqylaýshylar qatary barynsha keńeitildi. Buǵan deiin baqylaýshylar tobyna depýtattar, BAQ, qoǵamdyq birlestikterdiń, saiasi partiialardyń ókilderi, agenttik jáne ózge de memlekettik organdardyń qyzmetkerleri kirdi. Endi árbir kámelet jasqa tolǵan áreketke qabiletti azamat baqylaýshy bola alady. Bul úmitkerlerge konkýrstyq komissiianyń hatshysyn aldyn ala habardar ete otyryp, óziniń baiqaýshysyn áńgimelesýge shaqyrýǵa múmkindik beredi», - dedi ol.
Agenttik basshysynyń aitýynsha, tórtinshiden, buryn komissiia sheshimi daýys berý jolymen qabyldanatyn. Máselen, komissiianyń keibir músheleri konkýrstyq komissiia músheleriniń baǵalaýy boiynsha basqa kandidattardan az ball jinaǵan kandidatqa daýys bere alatyn. Sońǵy túzetýlerge sáikes, komissiia músheleri daýys berý arqyly laýazymǵa kandidatty tańdamaidy. Konkýrstyq komissiianyń sheshimi boiynsha bos laýazymǵa eń kóp ball jinaǵan kandidat ie bola alady. Bul rette, upailar úmitkerdiń jaýaptarynyń durystyǵy men tolyqtyǵyn, onyń essesiniń baǵasyn, onyń tájiribesin, bilimi men kommýnikativtik daǵdylaryn, laýazymnyń ereksheligine bailanysty qoiylatyn kriteriilerdi eskere otyryp qoiylady.
«Besinshiden, áńgimelesý konkýrs jeńimpazyn tańdaý kezinde jalǵyz ólshem bolyp tabylmaidy. Sonymen, konkýrsqa deiin úmitkerler memlekettik tildi jáne zańnamany bilýge testileýden, sondai-aq jeke qasietterin baǵalaýdan ótedi. Al «B» korpýsynyń basshy laýazymyna kandidattar (basqarma basshysy laýazymynan jáne odan joǵary) budan bólek esse tapsyrady. Sondai-aq konkýrstyq komissiianyń múshelerine laýazymnyń ereksheligine bailanysty tiisti jumys daǵdylary men quzyrettiligi bar eń úzdik kandidatty tańdaý úshin qosymsha irikteý quraldaryn qoldaný quqyǵy berilgen. Mysaly, konkýrstyq komissiia úmitkerlerden tiisti saladaǵy problemalar men olardy sheshý múmkindikteri boiynsha prezentatsiia jasaýdy, keistik nemese praktikalyq tapsyrmalardy sheshýdi jáne taǵy basqalaryn surai alady. «B» korpýsynyń bos memlekettik ákimshilik laýazymdaryna ornalasýǵa barlyq konkýrstar qatań túrde kórsetilgen talaptarǵa sáikes ótýi tiis. Atalǵan ózgertýler bizdiń azamattarymyz úshin memlekettik qyzmetke ornalasý rásimin jeńildetetinin, sondai-aq irikteý tetikteriniń transparenttiligin arttyratynyn atap ótemin», - dep jazdy Anar Jaiylǵanova.
