Memleket basshysy Qasym-Jomart Toqaev Jaiyq ózeniniń ekologiialyq jaǵdaiyna qatysty tapsyrma berdi, - dep habarlaidy "Ult aqparat" Aqordanyń baspasóz qyzmetine silteme jasap.
«Jaiyqtyń tartylýy jurtty qatty alańdatyp otyr. Dariianyń deńgeii sońǵy jyldary tómendep ketti. Ózen ańǵarynyń ekologiialyq ahýaly kúrt nasharlap, lastaný kórsetkishi boiynsha eń sońǵy, iaǵni besinshi dárejege jetti. Men osy kúrdeli máseleni birneshe ret halyqaralyq deńgeide kóterdim.
Qazaqstan men Reseidiń arasynda birqatar kelisim-shartqa qol qoiyldy. Ekologiiany, transshekaralyq ózenderdiń bioálemin saqtaý jáne ony tiimdi paidalaný tártibin retteitin quqyqtyq negiz bar. Kórshi elmen osy baǵyttaǵy áriptestikti nyǵaityp, kelisimderdiń múltiksiz oryndalýyna kúsh salý kerek. Bul iste bárin osy óńirdegi memleketterdiń ókilderine ǵana júktep qoiýǵa bolmaidy.
Sarapshylar, kásipkerler, úkimettik emes uiymdar jáne qoǵam belsendileri de óz mindetin atqarýǵa tiis. Jaiyqty saqtaýǵa bárimiz kúsh jumyldyrýymyz kerek. Ekologiialyq ahýaldyń nasharlaýy kóptegen salaǵa kesirin tigizedi. Naqty sharalardy búgin qabyldamasaq, erteń kesh bolýy múmkin. Sondyqtan tabiǵatty qorǵaýǵa qatysty kez-kelgen zań buzýshylyqtyń jolyn kesý kerek.
Ózenniń ańǵaryn túgel tekserip, ondaǵy nysandardyń zańdylyǵyn muqiiat qaraý qajet. Jaiyq ózeniniń boiyn tazalap, ekojúieni qalpyna keltirý úshin naqty sharalar qabyldaý kerek. Bul – oblys ákiminiń jáne Úkimettiń tikelei mindeti» - dedi Prezident Atyraý jurtshylyǵymen kezdesýde.
