Atyraýda Jaiyqtyń áli qatpaǵan muz oiyǵyna túsip ketken er adam qutqaryldy, dep habarlaidy "Ult aqparat".
«Adamnyń ómirin kóshedegi beinebaqylaý kamerasynyń kómegimen qutqardy. Kameraǵa oqiǵa bolǵan sát jazylyp qalǵan.
Bul keleńsiz jaǵdai búgin kúndiz saǵat shamamen 12:20 kezinde qala ortalyǵynda, Áliev pen Satybaldiev kóshelerin jalǵap turǵan avtokólik kópiriniń astynda bolǵan. Ózenniń ortasynda velosipedpen kele jatqan er adam qulap, muz oiyǵyna túsip ketken. Oqiǵa ornyna shúǵyl túrde politsiia patrýldik ekipajy, tótenshe jaǵdailar departamentiniń qutqarýshylary, jedel járdem brigadasy keldi. Qutqarýshylar men politsiia qyzmetkerleriniń birlesip áreket etýiniń nátijesinde 1988 jyly týǵan er adam sýdan qutqaryldy jáne jaǵada kútip turǵan dárigerlerge tapsyryldy», - dep habarlady aimaqtyń Politsiia departamentiniń baspasóz qyzmetinde.
Atyraý oblysynyń Politsiia departamenti turǵyndar men qala qonaqtaryna Jaiyq ózenindegi muzdyń áli qatpaǵandyǵyn eskertedi. Sonymen qatar, kúndizgi ýaqytta aýa temperatýrasy jyly bolady. Politseiler azamattardyń óz basyn qaýip-qaterge tikpeýge, iaǵni ózenniń muzymen júrmeýge shaqyrady.
