Atyraýda sot Jaiyq ózenindegi balyqtardyń jappai qyrylýyna kináli tarapqa úkim shyǵardy. Aiyptalýshylar qatarynda qalany aýyz sýmen qamtamasyz etip otyrǵan «Atyraý sý arnasy» KMK burynǵy basshylary bar, dep habarlaidy "Ult aqparat".
«Atyraý qalasy №2 sotynyń úkimimen «ASA» KMK burynǵy direktory R.Qurmetov Qylmystyq kodekstiń 37-baby 2-tarmaǵy, 328-baby 3-tarmaǵy, 204-babynyń 2-tarmaǵynda qarastyrylǵan qylmysty jasady degen aiyppen kináli dep tanyldy. Oǵan qylmystyq kodekstiń 58-babynyń 3-tarmaǵy negizinde neǵurlym qatań jaza qoldaný jolymen 2 jyl 6 aiǵa bas bostandyǵynan aiyrý jazasy taǵaiyndaldy. Sottalýshy 3 jyl memlekettik qyzmette laýazymdy qyzmet atqara almaidy. Direktordyń burynǵy orynbasary V.Sýshenko men sý tazalaý stansasynyń basshysy M.Chýrsin QK 328-babynyń 3-tarmaǵynda, 204-babynyń 2-tarmaǵynda kózdelgen qylmysty jasaǵany úshin kináli dep tanyldy. Olardyń árqaisysyna 2 jyl 6 aiǵa bas bostandyǵynan aiyrý jazasy taǵaiyndaldy. Sottalýshylar 3 jylǵa memlekettik qyzmette laýazymdy qyzmet atqarý quqyǵynan aiyryldy. Sottalýshylardyń jazasyn óteý orny - ortasha qaýipsizdiktegi túzeý mekemesi. Sondai-aq, sot «Atyraý sý arnasy» KMK-den Atyraý oblystyq orman jáne janýarlar dúniesi aýmaqtyq inspektsiiasynyń paidasyna - 13 million 924 myń teńge, Jaiyq-Atyraý bekire zaýytynyń paidasyna - 429 million 438 myń teńge, «Lýgovoi jylqy zaýyty» JShS paidasyna - 1 milliard 500 million 859 myń teńge mólsherinde materialdyq shyǵyndy óndirip alý jóninde úkim shyǵardy», - dep habarlady oblystyq sottyń baspasóz qyzmeti.
Eske sala keteiik, 2018 jyldyń jeltoqsan aiynda Jaiyq ózeninde balyq jappai qyrylyp qalǵan. Jaiyq-Atyraý bekire zaýyty bekire tuqymdas balyqtardyń jartysyn joǵaltty. «Lýgovoi jylqy zaýyty» JShS-niń taýarly bekire ósiretin balyq zaýyty zaýytynda 36 myń orys bekire tuqymdas – 101 tonna balyq ólgen. Jalpy 110 tonna balyq qyryldy. Jaiyqtaǵy popýliatsiia áli kúnge deiin qalpyna kelmedi.
