اتىراۋدا سوت جايىق ٶزەنٸندەگٸ بالىقتاردىڭ جاپپاي قىرىلۋىنا كٸنەلٸ تاراپقا ٷكٸم شىعاردى. ايىپتالۋشىلار قاتارىندا قالانى اۋىز سۋمەن قامتاماسىز ەتٸپ وتىرعان «اتىراۋ سۋ ارناسى» كمك بۇرىنعى باسشىلارى بار, دەپ حابارلايدى "ۇلت اقپارات".
«اتىراۋ قالاسى №2 سوتىنىڭ ٷكٸمٸمەن «اسا» كمك بۇرىنعى ديرەكتورى ر.قۇرمەتوۆ قىلمىستىق كودەكستٸڭ 37-بابى 2-تارماعى, 328-بابى 3-تارماعى, 204-بابىنىڭ 2-تارماعىندا قاراستىرىلعان قىلمىستى جاسادى دەگەن ايىپپەن كٸنەلٸ دەپ تانىلدى. وعان قىلمىستىق كودەكستٸڭ 58-بابىنىڭ 3-تارماعى نەگٸزٸندە نەعۇرلىم قاتاڭ جازا قولدانۋ جولىمەن 2 جىل 6 ايعا باس بوستاندىعىنان ايىرۋ جازاسى تاعايىندالدى. سوتتالۋشى 3 جىل مەملەكەتتٸك قىزمەتتە لاۋازىمدى قىزمەت اتقارا المايدى. ديرەكتوردىڭ بۇرىنعى ورىنباسارى ۆ.سۋششەنكو مەن سۋ تازالاۋ ستانساسىنىڭ باسشىسى م.چۋرسين قك 328-بابىنىڭ 3-تارماعىندا, 204-بابىنىڭ 2-تارماعىندا كٶزدەلگەن قىلمىستى جاساعانى ٷشٸن كٸنەلٸ دەپ تانىلدى. ولاردىڭ ەرقايسىسىنا 2 جىل 6 ايعا باس بوستاندىعىنان ايىرۋ جازاسى تاعايىندالدى. سوتتالۋشىلار 3 جىلعا مەملەكەتتٸك قىزمەتتە لاۋازىمدى قىزمەت اتقارۋ قۇقىعىنان ايىرىلدى. سوتتالۋشىلاردىڭ جازاسىن ٶتەۋ ورنى - ورتاشا قاۋٸپسٸزدٸكتەگٸ تٷزەۋ مەكەمەسٸ. سونداي-اق, سوت «اتىراۋ سۋ ارناسى» كمك-دەن اتىراۋ وبلىستىق ورمان جەنە جانۋارلار دٷنيەسٸ اۋماقتىق ينسپەكتسيياسىنىڭ پايداسىنا - 13 ميلليون 924 مىڭ تەڭگە, جايىق-اتىراۋ بەكٸرە زاۋىتىنىڭ پايداسىنا - 429 ميلليون 438 مىڭ تەڭگە, «لۋگوۆوي جىلقى زاۋىتى» جشس پايداسىنا - 1 ميلليارد 500 ميلليون 859 مىڭ تەڭگە مٶلشەرٸندە ماتەريالدىق شىعىندى ٶندٸرٸپ الۋ جٶنٸندە ٷكٸم شىعاردى», - دەپ حابارلادى وبلىستىق سوتتىڭ باسپاسٶز قىزمەتٸ.
ەسكە سالا كەتەيٸك, 2018 جىلدىڭ جەلتوقسان ايىندا جايىق ٶزەنٸندە بالىق جاپپاي قىرىلىپ قالعان. جايىق-اتىراۋ بەكٸرە زاۋىتى بەكٸرە تۇقىمداس بالىقتاردىڭ جارتىسىن جوعالتتى. «لۋگوۆوي جىلقى زاۋىتى» جشس-نٸڭ تاۋارلى بەكٸرە ٶسٸرەتٸن بالىق زاۋىتى زاۋىتىندا 36 مىڭ ورىس بەكٸرە تۇقىمداس – 101 توننا بالىق ٶلگەن. جالپى 110 توننا بالىق قىرىلدى. جايىقتاعى پوپۋلياتسييا ەلٸ كٷنگە دەيٸن قالپىنا كەلمەدٸ.
