Batys Qazaqstan oblysynda Jaiyq ózeniniń ústinen uzyndyǵy 2,9 shaqyrym kópir salynatyn bolady.
Bul jaiynda QR Premer-Ministriniń Parlament depýtattary saýalyna bergen jaýabynda aitylǵan, dep habarlaidy "Ult aqparat".
«Bul kópirdiń jalpy uzyndyǵy kirme joldy qosa alǵanda 12,1 shaqyrymdy quraidy. Kópirdiń uzyndyǵy - 2,9 shaqyrym, kirme joly – 9,2 shaqyrym. 2019 jyldyń 11 sáýirindegi №01-01121/19 memlekettik saraptama qorytyndysyna sáikes qurylys quny – 36 mlrd teńge.
«2020-2022 jyldarǵa arnalǵan respýblikalyq biýdjet týraly» QR Zańynyń jobasyn jasaý aiasynda ótinim bolǵan joq. 2020 jylǵa arnalǵan respýblikalyq biýdjetti birinshi naqtylaý aiasynda Batys Qazaqstan oblysynyń ákimdigi jobany júzege asyrýdy bastaýǵa 1 mlrd teńge somasynda qarajatty respýblikalyq biýdjetten bólýge biýdjettik ótinim jiberdi», - dedi Asqar Mamin.
Úkimet basshysynyń atap ótýinshe, atalǵan jobany biýdjettik baǵdarlama ákimshisi – QR Indýstriia jáne infraqurylymdyq damý ministrligi qoldap otyr. Jobaǵa qarajat bólý máselesi 2020 jylǵa arnalǵan respýblikalyq biýdjetti birinshi naqtylaý barysynda Qazaqstan Respýblikasynyń bekitilgen zańnamasyna sai qarastyrylatyn bolady.
«Buǵa qosa, joba qunynyń qomaqty ekendigin eskere otyryp, jobaǵa qarjy bólý máselesin jergilikti biýdjetten teń qarjylandyrý jolymen tepe-teńdik negizde, sonymen qatar 2021-2023 jyldarǵa arnalǵan respýblikalyq biýdjetti qalyptastyrý aiasynda josparly túrde kezeń-kezeńimen qarastyrý qajet dep sanaimyz», - dedi Úkimet basshysy.
Aita keteiik, QR Parlamenti Senaty men Májilisiniń bir top depýtaty Batys Qazaqstan oblysynyń Aqjaiyq aýdanyna qarasty Chapaev aýylynyń aýmaǵynda Jaiyq ózeniniń ústinen avtomobil júretin kópir salý máselesin kótergen bolatyn.
