Jaiyq ózenindegi sý deńgeii kóterilse, Oral qalasy tóńiregindegi saiajailardy basýy yqtimal. Bul týraly Batys Qazaqstan oblysynyń ákimi Altai Kólginovtiń tóraǵalyǵymen ótken oblys ákimdigi janyndaǵy quqyqbuzýshylyqtyń aldyn alý boiynsha vedomstvoaralyq komissiianyń otyrysynda aityldy, dep habarlaidy Ult.kz tilshisi «QazAqparat» agenttigine silteme jasap.
QR AShM Sý resýrstary komiteti sý resýrstaryn paidalanýdy retteý jáne qorǵaý jónindegi Jaiyq-Kaspii basseindik inspektsiiasynyń basshysy Ǵalidolla Azidýllinniń aitýynsha, qazirgi tańda Jaiyq ózenindegi sý deńgeiiniń kóterilýi qalypty. Kúnine 80 santimetrdiń ornyna 14 santimetrge kóterilýde. Aldaǵy tórt-bes kúnde Aqtóbe oblysyndaǵy Elekten sý keledi dep boljanýda. Oǵan qosa Orynbor oblysy aýmaǵyndaǵy Jaiyqtyń taǵy bir salasy Saqmardan da kóp mólsherde sý kelmekshi. Eger ekeýinen sý bir mezette kelip qalsa, Jaiyq ózeniniń Oral qalasy tusyndaǵy deńgeii 700 santimetrden asýy múmkin. Ondai jaǵdaida shahar tóńiregindegi saiajailarǵa (1-saiajai jáne 2-saiajai) qaýip tónedi.
BQO TJ departamentiniń málimetine qaraǵanda, ózen mańynda 11 myńdai adam turaqty turyp jatsa, sonyń 2,5 myńy tikelei jaiylmalardy mekendeýde. Olardyń barlyǵyna sý tasqynynyń bolýy yqtimal ekendigi jóninde eskertildi.
Osyǵan orai Altai Kólginov kóktemgi sý tasqynyna bailanysty tiisti sharalardyń bárin alyp, eń aldymen turǵyndar arasynda túsinik jumystaryn aldyn ala júrgizip, olardyń qaýipsizdigin qamtamasyz etýdi, barlyq jaýapty organdarǵa kúsheitilgen tártippen jumys jasaýdy tapsyrdy.
Komissiia otyrysynda sondai-aq kósheler men qoǵamdyq oryndardaǵy quqyqbuzýshylyqtyń aldyn alý boiynsha atqarylǵan jumystar jáne ózgeniń múlkin urlaý derekterin boldyrmaý baǵytynda alda turǵan mindetter de talqylandy.
Aita keteiik, munyń aldynda óńir basshysy bastaǵan sý tasqynyna qarsy oblystyq shtab músheleri Jaiyq ózeni boiyndaǵy sý basýy múmkin jerlerdi áýe arqyly da sholyp shyqqan bolatyn.
