Túrkistan oblysynyń ákimi Darhan Satybaldy Tólebi aýdanyna baryp, turǵyndarmen kezdesti. Turǵyndardyń ótinishteri men usynys-tilekterin tyńdady. Óńir basshysy óńirdi, aýdandy damytý jumystary jóninde de baiandap berdi.
«Búgin Tólebi aýdanyna ózderińizben júzdesip, mańyzdy máselelerdi talqylaý úshin arnaiy kelip turmyz. Memleket basshysy Qasym-Jomart Kemeluly Joldaýynda halyqtyń kókeiinde júrgen ózekti máseleler boiynsha tapsyrmalar berdi. Memleket basshysy júktegen jaýapkershilikti sezinip, jumys isteýge mindettimiz. Elimizde «Jaily mektep» pilottyq ulttyq jobasy ázirlenýde. Salynatyn mektepter jana formatta bolady. «Jaily mektep» jobasy aiasynda Tólebide birneshe mektep salynady. Lengirde – 1500 oryndyq, Birinshi Mamyrda – 1500 oryndyq, Dostyqta – 900 oryndyq, Kóksáiekte – 600 oryndyq, sondai-aq Qosaǵashta 600 oryndyq jańa mektepterdiń kurylysy josparlanyp otyr», – dedi Darhan Satybaldy.
«Aýyl – El besigi» jobasy aiasynda 2022 jyly 6 eldi mekende 6 joba iske asyrylýda. Ekpindi eldi mekenin elektr qýatymen qamtamasyz etýge 110 mln. teńge qaralǵan. Birinshi Mamyr eldi mekeninde jańadan sport alańshasyn salýǵa, Momynai eldi mekeninde jańadan mádeniet úiin salýǵa qarjy qaraldy. Aýdannyń injenerlik infraqurylym júiesin damytý maqsatynda 19 biýdjettik investitsiialyq joba júzege asyrylyp jatyr. Aýdan halqynyń 99,8%-y aýyz sýmen qamtylǵan. Tabiǵi gazben 90,4% nemese 109 myń turǵyn qamtylǵan. Lengir qalasynda 5 qabatty 20 páterli turǵyn úidiń qurylys jumystary júrgizilýde.
Ákimmen kezdesýde jáne jeke qabyldaýda turǵyndar mekteppen, jolmen qamtý, jer kezegi, infraqurylym, aýyl sharýashylyǵyn, qymyz sharýashylyǵyn sýbsidiialaý jáne ózge de máselelerdi kóterdi. Óńir basshysy árbir turǵynnyń ótinishin tyńdap, olar boiynsha tiisti jumys júrgiziletinin málimdedi.
Oblys ákimi memleketten qaitarymsyz grant alyp, óz kásibin júrgizip jatqan aýdan kásipkerleri óndirgen taýar kórmesin tamashalady. Jyl basynan beri Tólebi aýdanynda 100-ge jýyq turǵyn memlekettiń qoldaýymen óz biznes-ideialaryn júzege asyrǵan.
Osy jumys saparynda Darhan Satybaldy Lengir qalasynda jýyrda paidalanýǵa berilgen «Ardagerler úiiniń» tynys-tirshiligimen tanysty. Demeýshiler esebinen qurylysy júrgizilgen ardagerler úii 5 bólmeden turady. «Ardagerler úii» ǵimaratynda ardagerlerdiń erkin tynyǵýy úshin barlyq jaǵdai jasalǵan. Olardyń erkin pikir almasyp, túrli is-sharalar uiymdastyrýyna arnalǵan májilis zaly da salynǵan. Ardagerlermen, júzdesken óńir basshysy olardyń usynystary men pikirlerin tyńdap, suraqtaryna jaýap berdi.
