Búgin Májiliste «Jańa Qazaqstan» depýtattyq toby qańtar oqiǵasy boiynsha Bas prokýratýraǵa birqatar saýal joldady. Májilistiń jalpy otyrysynda berilgen jaýaptarǵa depýtat Janarbek Áshimjan pikir bildirdi, dep habarlaidy QazAqparat.
«Ótken aptada jariialanǵan depýtattyq saýalymyzǵa bailanysty búgin Bas prokýror, Ishki ister ministri, Sybailas jemqorlyqqa qarsy is-qimyl agenttiginiń tóraǵasy, basqa da kúsh qurylymynyń basshylary baiandama jasady. Depýtattardyń tarapynan kóptegen suraqtar qoiyldy. Ashyǵyn aitqan kezde barlyq baiandamashylardan góri quqyq qorǵaýshylar Abzal Quspan men Aiman Omarovanyń baiandamasynda kóp nárse aitylǵandai kórindi. Osy saýaldy joldaǵan depýtat retinde aitsam, kúsh qurylymdary basshylarynyń baiandamalarynda keltirilgen derekter kóńilimnen tolyq shyqqan joq. Qoǵam tarapynan qoiylǵan suraqtarǵa tolyq jaýap berildi dep aita almaimyn. Biraq sol kúsh qurylymynyń basshylary, memlekettik organnyń jetekshileri qazirgi kúni tergeý amaldary júrip jatqanyn, soǵan bailanysty kóp másele qupiia jaǵdaida júrip jatqanyn eskertti. «Sol sebepti kóp jaǵdaidy ázirge qoǵamǵa ashyq aita almaimyz. Tergeý amaldary tolyq bitken soń barlyq jaǵdaidy halyqqa tiisti deńgeide jetkizemiz» dedi. Osy taraptan alǵan kezde men jaýaptarǵa jartylai qanaǵattandym dep aitýǵa bolady», - deidi depýtat.
Onyń paiymynsha, memlekettik organdar basshylarynyń baiandamalarynda keltirilgen derek-dáiekterdiń birazy osy kúnge deiin de aitylǵan.
«Sol kúnderi qansha ǵimaratqa qansha adam shabýyl jasady, qansha adam qaitys boldy, áskeri adamdardan qansha adam zardap shekti, biznes nysandary qalai qirady degen sekildi suraqtarǵa BAQ-ta shetpushpaqtap biraz málimet shyqqan. Sol málimetter jańartylypty, tolyqtyrylǵan derekter tyńdadyq dep aitýǵa bolady. Al qoǵam tarapynan «Bul oqiǵany kimder uiymdastyrdy, kriminaldyq toptardyń jetekshileri kimder, olarǵa yqpal etip otyrǵan laýazymdy tulǵalar kimder» degen siiaqty saiasi mándegi suraqtar kóp qoiylyp jatyr. Solarǵa jaýap molyraq berilmedi. Aldaǵy ýaqytta osyǵan tolyq jaýap alamyz ǵoi dep oilaimyn», - dedi Májilis ókili.
Sondai-aq, ol qańtar oqiǵasynan durys qorytyndy shyǵarylýyna búkil Qazaqstan qoǵamy múddeli ekenin eske saldy.
«Eń negizgisi, 4,5,6,7,8 qańtar kúnderi birinshi bolyp, Memleket basshysy retinde Qasym-Jomart Toqaev úlken jaýapkershilikti moinyna aldy. Arada eki aidan artyq ýaqyt ótti. Jaýapkershilik Prezidenttiń ǵana moinynda bolmaýy kerek. Tiisti salalyq Úkimet músheleriniń de, óńirdegi ákimderdiń de, jalpy kúsh qurylymy basshylarynyń, sol salada qyzmet etetin tiisti laýazymdy tulǵalardyń da jaýapkershiligi bolýǵa tiis. Sol sebepti bári óz salasy boiynsha, ashyq, qanyq jáne naqty aqparat berýi kerek. Resmi aqparat almaǵan jerde áleýmettik jelide túrli alypqashpa áńgimeler týyndaidy. Ol halyqtyń kóńil kúiine de túrli áser etedi. Sondyqtan jaýapkershilikti tek Prezidentke itere bermei, bárimiz, qoǵam da, bilik te, Parlament te, Úkimet te jaýapkershilikti teń bólisip, halyqqa naqty, shynaiy aqparatty qalaida jetkizýimiz kerek», - dedi Janarbek Áshimjan.
