Foto: TJM baspasóz qyzmeti
Premer-ministrdiń orynbasary Qanat Bozymbaev Aqtaýda apatqa ushyraǵan Azerbaijan Airlines (AZAL) ushaǵynyń qara jáshikterindegi derekter qanshalyq saqtalǵany, jáne tergeýdiń qalai júrip jatqary týraly aitty, - dep habarlaidy Ult.kz.
Bozymbaevtyń aitýynsha, qazir sarapshylar jumys istep jatyr.
"Qara jáshikter ashylyp, Qazaqstanǵa qaitaryldy, Bas prokýratýranyń qoldaýymen tergeý tobynda. Qazir sarapshylar jumys istep jatyr. Bul materialdardyń kóshirmeleri Ázerbaijan tarapynda da, Resei tarapynda da bar. Jasyratyn túgimiz joq", dedi vitse-premer Úkimettegi brifingte.
Odan bólek, Qanat Bozymbaev Úkimette ótip jatqan BAQ ókilderimen kezdesý kezinde Aqtaýdaǵy ushaq apatynan kóz jumǵan qazaqstandyqtardyń otbasylaryna qandai kómek kórsetilgeni jáne tergeý qalai júrip jatqany týraly málimdedi.
"Aqtaýdaǵy ushaq apatynyń aldyn ala qorytyndysy kelesi apta aiaqtalady. Qaza tapqandardyń otbasylaryna Úkimet tarapynan materialdyq kómek kórsetildi. Atap aitqanda, árbir kóz jumǵan adamǵa 5 mln teńge ótemaqy berildi. Jerleý rásimderine kómek kórsetildi. Demeýshilerdiń kómegimen kelesi apta taǵy da kómekter beriledi", - dedi Premer-ministrdiń orynbasary.
Bozymbaevtyń aitýynsha, qazirgi ýaqytta Ádilet ministrligi janyndaǵy sot saraptamasy tiisti jumystardy júrgizip jatyr.
"Týystary bul rasynda da ushqyshtardyń, ekipaj músheleriniń daýystary ekenine senýi kerek. Bul – úlken halyqaralyq jumys. Kelesi aptada aldyn ala bólim jariialanady dep úmittenemiz", – dep qosty vitse-premer.
Eske salaiyq, 2024 jylǵy 25 jeltoqsanda Aqtaý mańynda Azerbaijan Airlines áýekompaniiasynyń AHY8243 reisimen Baký (Ázerbaijan) – Groznyi (Resei) baǵyty boiynsha ushqan jolaýshylar ushaǵy apatqa ushyraǵan edi.
Oqi otyryńyz: Aqtaýdaǵy ushaq apaty: oqiǵa hronologiiasy
