«Jasyl» ekonomika ulttyq mádeniettiń bólshegine ainalýy tiis. Bul týraly elordada ótip jatqan Jańartylatyn energiia kózderi jónindegi III sammitte QR Tuńǵysh Prezidenti – Elbasy qorynyń atqarýshy direktory Áset Isekeshev aitty, dep habarlaidy QazAqparat.
«Adamdardyń kópshiliginde jasyl ekonomika túsinigi – bul kún jáne jel elektr stansasy. Degenmen, bul olai emes. Jasyl ekonomika – bul damýdyń basqa satysy, basqa ómir salty. Bul – jasyl ekologiialyq kólik, sý, jylý, elektr energiiasyn paidalaýdy durystap únemdeý, qurylysta jańa ádister engizý, qoqysty kádege jaratý úshin jinaýǵa durys qaraý, qalalarda, saiabaqtar men gúlzarlarda jasyl atmosfere qalyptastyrýdyń jańa ádisteri, jasyl aýyl sharýashylyǵy. Munyń barlyǵy da eń aldymen bizdiń tabiǵatymyz ben ekologiiamyzǵa zor áserin tigizedi, odan keiin naqty resrýstarmen qatar qarjylyq resrýstardy da barynsha únemdeidi», - dedi Áset Isekeshev.
Onyń atap ótýinshe, elimizdiń birqatar óńirlerinde mundai júieli jobalar júzege asyryla bastaǵan. Qazirdiń ózinde olar qarjy únemdeýge septigin tigizip otyr. Máselen, elordada jańa energiia únemdi materialdardy, qurylysty jobalaý barysynda modeldeýdiń aqparattyq júiesin qoldaný arqyly turǵyn úi salýdyń jańa ádisteri qurylys salasyna engizý boiynsha joba qolǵa alynǵan.
«Klimaty sýyq óńirlerimiz úshin bul óte mańyzdy. Sebebi kúrdeli nysandardy bir qurylys maýsymynda salyp shyǵýǵa múmindik beredi. Bul qomaqty qarajat. Sonymen qatar qurylys barysynda ǵana emes ǵimaratty basqarý da munyń mańyzy joǵary. Máselen, Ulybritaniiada engizilgen bul printsip energiia tutynýdy 25 paiyzǵa, sýdy 30 paiyzǵa, mundai ǵimaratty kútip ustaý shyǵyndaryn 30 paiyzǵa qysqartýǵa múmkindik bergen. Osydan-aq qansha qarajat únemdeýge bolatyndyǵyn oilańyzdar», - dedi qor basshysy.
Sonymen qatar ol elordada 2018 jyldan bastap qatty turmystyq qaldyqtardy suryptap jinaý boiynsha joba qolǵa alynǵanyn, jinalǵan qoqysty kádege jaratatyn kásiporynnyń iske qosylǵanyn aitty.
«Eń aldymen balalar men jastarda «jasyl» mentalitet, oilaý mádenietin qalyptastyrý óte mańyzdy. Munymen maqsatty túrde ainalysý qajet jáne bul ulttyq mádeniettiń bóligine ainalýy tiis», - dedi Áset Isekeshev.
.jpeg)