Ortalyq kommýnikatsiialar qyzmetinde Nur-Sultan, Almaty men Shymkent qalalarynda jastarǵa beriletin jaldamaly páter baǵdarlamasyna qalai qatysýǵa bolatyndyǵy aityldy, dep habarlaidy QazAqparat.
«Elbasynyń tapsyrmasyna sáikes, Nur-Sultan, Shymkent jáne Almaty qalalarynda keminde 1 myń jaldamaly páter salý sharalary qabyldanǵan. Keiin bul tapsyrma keńeitilip, jastarǵa úsh qalada úsh myń páterge deiin salý jóninde tapsyrma berilgen bolatyn. Erejege sáikes, birinshi kezekte 29 jasqa deiingi jas jigit nemese boijetken resmi túrde Nur-Sultan, Almaty nemese Shymkent qalasynyń turǵyny bolýy tiis. Sondai-aq, erejege sáikes, jas adamnyń turaqty jumys oryny bolýy jáne jyljymaityn múlki bolmaýy kerek. Sebebi, biz jastarǵa óz turǵyn úiin satyp alý úshin bastapqy jarna jinaýǵa múmkindik berýimiz kerek», - dedi QR Aqparat jáne qoǵamdyq damý ministrligi Jastar jáne otbasy isteri komitetiniń tóraǵasy Madiiar Qojahmet.
Komitet tóraǵasynyń aitýynsha, budan bólek úmitkerdiń bankte shoty bolýy tiis.
«Óitkeni, onyń bastapqy jarnany jinaýǵa qyzyǵýshylyǵy bolýy qajet. Sonymen qatar, bul jobanyń maqsaty – jastarǵa óz turǵyn úiin alýǵa múmkindik berý. Úmitkerdiń qyzmettegi jetistikteri boiynsha tiisti kýálikterin rastaityn qujattaryn kórsetse qosymsha taǵy jeńildikter beriledi. Sonymen qatar, ótinish berýshiniń otbasy jáne balalary bolǵan jaǵdaida qosymsha jeńildikter qarastyrylǵan», - dedi ol Ortalyq kommýnikatsiialar qyzmetinde ótken baspasóz máslihatynda.
Madiiar Qojahmettiń aitýynsha, jumys isteitin jastarǵa arnalǵan jalǵa beriletin turǵyn úi baǵdarlamasy 2021 jylǵa deiin jumys isteidi.
«Statistikalyq málimetterge súiensek, Qazaqstanda 29 jasqa deiingi 4 mln-ǵa jýyq jastar bar. Onyń ishinde 245 myńy Nur-Sultan qalasynda, 700 myńy Almatyda, 260 myńy Shymkent qalasynda turady. Tapsyrmaǵa sáikes, osy úsh qalada keminde 3 myń páter tapsyrylady. Jyl saiyn úsh myń páter tapsyrylatyn bolsa, onda osy jýyq arada árbir qalada 9 myń páter tapsyrylýy tiis degen oidamyz. Bul páterdi jalǵa berý merzimi bes jyl dep belgilenip otyr. Bul maqsatta biýdjetten 21 mlrd teńge bólinip, úsh qalaǵa aýdarylǵan. Jergilikti atqarýshy organdar qazirgi tańda úi satyp alý máselesin qolǵa alyp jatyr», - dedi Madiiar Qojahmet.
Jalǵa beriletin úiler jastarǵa satyp alý quqyǵysyz beriledi. Jalǵa berý baǵasy aiyna 10-12 myń teńge kóleminde bolady.
Eske sala ketsek, byltyr Jastar jylynyń ashylýyna arnalǵan saltanatty jiynda Elbasy Nursultan Nazarbaev Astana, Almaty jáne Shymkent qalalarynda jastar úshin jylyna 1 myń páter salynatynyn málim etken bolatyn.
Al byltyr kúzde Úkimettiń keńeitilgen otyrysynda sol tustaǵy Indýstriia jáne infraqurylymdyq damý ministri Jeńis Qasymbek (qazir - Premer-ministrdiń orynbasary) Astana, Almaty, Shymkent jumysshy jastaryna 1 myń páter salý mamyrda bastalatynyn habarlaǵan edi.
