Petropavlda eńbek jastaryna berilýi tiis jataqhanany paraǵa ońdy-soldy taratqan Jumyspen qamtý ortalyǵynyń direktory, onyń eki sybailasy jáne páterlerdi zańsyz almaq bolǵan 10 adam jazalandy, dep habarlaidy QazAqparat.
Soltústik Qazaqstan oblysy sybailas jemqorlyqqa qarsy qyzmettiń málimetinshe, Petropavlda birneshe ret para alý faktisi boiynsha halyqty Jumyspen qamtý ortalyǵy direktoryna qatysty qylmystyq iske qatysty usynym qaraldy.
SQO Sybailas jemqorlyqqa qarsy qyzmetiniń basshysy Jarqyn Ǵalymovtyń aitýynsha, memlekettik baǵdarlama aiasynda 29 jasqa deiingi eńbek jastaryna berilýi tiis jataqhanalardaǵy páterler 2020 jyldyń mamyrynan 2021 jyldyń aqpanyna deiin zańsyz berilip kelgen.
«9 ai ishinde qalalyq Jumyspen qamtý ortalyǵynyń basshysy eki JShS ókilderimen eńbek jastarynan 5 jyl merzimge jalǵa beriletin páterdi usynǵany úshin jalpy somasy 4,4 mln teńge para alǵan», - dedi Jarqyn Ǵalymov.
Petropavl qalalyq soty Jumyspen qamtý ortalyǵynyń eks-direktoryna jáne para alý faktileri boiynsha onyń eki sybailasyna sot úkimin shyǵardy. Eks-direktor ómir boiy memlekettik qyzmet atqarý quqyǵynan aiyryla otyryp, 8 jylǵa qamaldy. Onyń «kómekshileri», iaǵni JShS ókilderi árqaisysy 7 jylǵa bas bostandyǵynan aiyryldy.
«Qylmystyq áreketin júzege asyrý úshin ortalyq direktory birge istemeitin eki adamdy tartqan. Olardyń mindeti - jumyspen qamtý jol kartasy jáne «Eńbek» memlekettik baǵdarlamalarynyń qoldanylý aiasyna kiretin, turǵyn úige muqtaj adamdardy izdeý jáne olarǵa páter bergeni úshin syiaqy alý bolǵan. Ár berilgen páter úshin bul top 200-800 myń teńge zańsyz aqy alǵan. Tergeý barysynda jalǵan eńbek sharttaryn jáne áleýmettik kelisimsharttardy usyný arqyly 5 adamnyń páterlerdi zańsyz alǵany anyqtaldy. Páter alǵan 2 adam ótinish berý kezinde 29 jasta bolǵan», - deidi SQO sybailas jemqorlyqqa qarsy qyzmetiniń Preventsiia basqarmasynyń basshysy Damir Habibýlin.
Al, jylytý maýsymy aiaqtalysymen jastardyń taǵy 5 ókiline aldyn ala para alý arqyly páter berý josparda bolǵan.
Damir Habibýlinniń aitýynsha, búginde jaldamaly páterlerdi zańsyz alý úshin para bergen 10 adam jazalandy. Olarǵa 3 millionnan 21,3 mln teńgege deiin aiyppul salyndy jáne bireýi 2 jylǵa bas bostandyǵynan aiyryldy.
«Sondai-aq, qyzmettik turǵyn úidi bólý jónindegi turǵyn úi komissiiasynyń otyrysy formaldy túrde ótkizilgen, jalǵa beriletin turǵyn úi alýǵa úmitker tulǵalardyń ótinishterin tirkeý jýrnaly júrgizilmegen, páter kiltteri direktordyń qolynda bolǵan. Osylaisha onyń jalǵa beriletin turǵyn úidi berýde jeke-dara sheshim qabyldaǵany anyqtaldy», - deidi Damir Habibýlin.
Qyzmettik mindetterin tiisinshe oryndamaǵany jáne vedomstvolyq baqylaýdy júrgizbegeni úshin qala ákiminiń orynbasary tártiptik jaýapkershilikke tartyldy.
