Foto: "Jastar" ǵylymi-zertteý ortalyǵy
Qazaqstandyq jastar arasynda qarjylyq mádeniet nyǵaiyp keledi. Bul týraly «Jastar» ǵylymi-zertteý ortalyǵy júrgizgen jańa saýalnama nátijeleri málimdedi, dep habarlaidy Ult.kz.
Zertteý kórsetkendei, 35 jasqa deiingi qazaqstandyqtardyń 25%-ynda depozit jinaǵy bar. Qarjy jinaýǵa eń belsendi top — 24–28 jas aralyǵyndaǵy jastar (28,8%).
Jas sanatyna qarai depoziti bar azamattar úlesi bylai bólinedi:
-
14–18 jas: 9,4%
-
19–23 jas: 22,2%
-
24–28 jas: 28,8%
-
28–34 jas: 25,4%
Saýalnama boiynsha jastardyń 2,8%-ynda eki jáne odan da kóp depozit bar. Al 43,4% jas tek bir depozitke aqsha jinaidy. Sarapshylardyń aitýynsha, bul jastardyń erte jastan qarjylyq táýelsizdikke umtylatynyn kórsetedi.
Depozit ashý búginde ońai: tegin, onlain qoljetimdi jáne kez kelgen somamen ashýǵa bolady. Bul da jas býynnyń jinaq jasaýǵa daǵdylanýyna yqpal etip otyr.
Prezident Qasym-Jomart Toqaev biylǵy Joldaýynda halyqtyń qarjylyq saýatyn arttyrýdyń jáne qaryz júktemesin azaitýdyń mańyzyn atap ótken bolatyn. Sondai-aq 2022 jyldan beri júzege asyp kele jatqan «Qaryzsyz qoǵam» jobasy aiasynda millionǵa jýyq azamat qarjylyq bilim alyp, quqyqtyq kómekke júgingen.
Mektepter men ýniversitetterde de qarjylyq qaýipsizdik boiynsha sabaqtar ótkizilip jatyr: biyldyń ózinde 567 myń oqýshy jáne 100 myńnan asa stýdent qamtylǵan.
Zertteý qoǵamda qarjylyq mádeniettiń nyǵaiyp kele jatqanyn kórsetedi. Sarapshylardyń pikirinshe, jastardyń bolashaǵyna jaýapkershilikpen qaraýy men memleket usynǵan baǵdarlamalar bul úrdisti odan ári jandandyra túspek.
