QR Sybailas jemqorlyqqa qarsy is-qimyl agenttiginiń tóraǵasy Shyǵys Qazaqstan oblysyna jumys sapary barysynda oblys ákiminiń qoǵamdyq qabyldaýynyń tusaýkeserine qatysty, dep habarlaidy "Ult aqparat" agenttiktiń baspasóz qyzmetine silteme jasap.
Qoǵamdyq qabyldaý qyzmetiniń maqsaty – «bir tereze» ustanymy boiynsha oblystyń jergilikti atqarýshy organdaryna júginýge qolaily jaǵdai jasaý, memlekettik organdardyń qyzmetine qatysty aqparattardy usynýdyń qoljetimdigi men sapasyn arttyrý.
Memleket basshysy bekitken «halyq únine qulaq asatyn memleket» tujyrymdamasyn iske asyrý maqsatynda agenttik tóraǵasy Alik Shpekbaev jáne oblys ákimi Danial Ahmetov atalǵan qoǵamdyq qabyldaý alańynda azamattardy jeke máseleler boiynsha qabyldady.
Sondai-aq, «Shyǵys – Adaldyq alańy» jobalyq keńsesiniń jáne «Biznes pen investitsiiany qorǵaý» jobasynyń birlesken qyzmeti aiasynda Sybailas jemqorlyqqa qarsy qyzmet basshysy ShQO jedel basqarý, aqparattyq tehnologiialar jáne «INVEST IN EAST» investitsiialyq keńsesiniń ortalyqtarymen tanysty.
Dál osy kúni A.Shpekbaev jáne D.Ahmetov D.Serikbaev atyndaǵy ShQMTÝ-de ótken «Parasatty urpaq» atty sybailas jemqorlyqqa qarsy stýdenttik forýmge qatysty. Forýmda qazaqsha kúresten QR eńbek sińirgen sport sheberi, «Álem barysy», «Qazaqstan barysy» Aibek Nuǵymarov, álem chempiony, Olimpiada oiyndarynyń qola júldegeri Iýliia Galysheva, Shákárim atyndaǵy Semei memlekettik ýniversitetiniń rektory Meiir Eskendirov, «Sanaly urpaq» belsendileri sóz sóiledi.
Parasat pen adaldyqty beineleitin «Aq alaqan» – «Chistye rýki» jobasy tanystyrylyp, ýniversitettiń Parasat keńsesi ashyldy.
Óz kezeginde, forýmdy qorytyndylai kele, agenttik tóraǵasy, Qazaqstan jastary – sybailas jemqorlyqqa qarsy is-qimyl jasaýǵa daiyn eń belsendi jáne nátijeli top ekenin atap ótti.
Sonymen qosa, jastardy sybailas jemqorlyqqa qarsy tárbieleýge jáne otbasy institýtynyń róline nazar aýdardy.
«Bilim uiymdarynyń sybailas jemqorlyqqa qarsy aǵartý salasyndaǵy belsendi áleýmettik sala ekeni sózsiz. Degenmen, meniń oiymsha jastarda jemqorlyqqa qarsy mádeniet qalyptastyrýda otbasy, naqtyraq aitqanda onyń tárbielik fýnktsiiasy eń mańyzdy ról atqarady. Otbasynda óskeleń urpaqtyń tárbiesine erekshe nazar aýdarylýy tiis, sebebi balanyń sanasy men quqyqtyq mádenieti onyń tárbesine bailanysty. Eger onyń boiynda ar-uiat, ádildik pen parasat bolsa, ol eshqashan zań buzbaidy, demek sybailas jemqorlyq quqyq buzýshylyǵyn jasamaidy jáne halqyna adal qyzmet etedi», - dep atap ótti A.Shpekbaev.
Forým sońynda Sybailas jemqorlyqqa qarsy qyzmet basshysy «Shyǵys – Adaldyq alańy» jobasy aiasynda Shyǵys Qazaqstan gýmanitarlyq kolledjine bardy. Bilim mekemelerindegi parasat mektepteriniń maqsaty – óskeleń urpaqtyń boiynda rýhani qundylyqtar men joǵary adamgershilik qasietterdi, sybailas jemqorlyqqa qarsy mádenietti qalyptastyrý.
Sondai-aq, agenttik tóraǵasy S.Amanjolov atyndaǵy Shyǵys Qazaqstan memlekettik ýniversitetiniń stýdentterge qyzmet kórsetý ortalyǵynyń jumysymen tanysty. Atalǵan ortalyqta stýdentterge «bir tereze» ustanymy boiynsha ákimshilik jáne keńes berý baǵytyndaǵy qyzmetter kórsetiledi.
