Saltanat saraiynda jastardyń dini saýattylyǵyn arttyrý máselesi boiynsha imamdarǵa arnalǵan «Jastar jáne rýhaniiat» atty ǵylymi-tájiribelik konferentsiia ótti. Jiyn memlekettiń din salasyndaǵy saiasatyn iske asyrý jáne imamdardyń jastarmen jumys isteý tájiribesin arttyrý maqsatynda uiymdastyryldy. Oǵan oblys ákiminiń orynbasary Aqan Ábdýaliev pen imamdar, din basqarmasynyń ókilderi qatysty.
Alǵashqy sóz kezegin alǵan Aqan Jylqyshybaiuly meshit qyzmetkerlerin attestatsiianyń sátti aiaqtalýymen quttyqtai otyryp, Prezidenttiń jastarǵa arnaǵan sózine toqtaldy. Óńirdegi 408 218 jastyń ekonomikalyq ahýalyn jaqsartý men bilim alý múmkindigin keńeitip, mamandyq boiynsha jumysqa ornalasýǵa, kásipkerlikpen ainalasýǵa mol múmkindikter berilgenin aitty. Búgingi kúnniń eń ózekti taqyryptarynyń biri dini ekstremizmmen kúres jaiyn da tysqary qaldyrmaǵan oblys ákiminiń orynbasary:
- Biz dini ekstremizmge qarsy kúreste Elbasy maqalasynyń negizgi oiy – ulttyq sipat pen sanany jańǵyrtýdy baǵdar etýimiz kerek. Bul rette, jańa jobalar arqyly babalardyń asyl sózin sapaly túrde sanaǵa sińirý, boiymyzdaǵy qazaqylyqty oiatý, ulttyq óner týyndylaryna jańa deńgeide nazar aýdarý, din men dástúrdiń úilesimdi qundylyqtaryn keńinen nasihattaý – barshamyzdyń aldymyzdaǵy mindet, – dep túidi.
Kelesi bolyp sóz sóilegen QMDB tóraǵasynyń orynbasary, naib-múfti Alaý Ádilbaev dástúrli dini túsinikti qalyptastyrýdyń máni men mańyzy jaiynda sóz sóiledi.
– Súnnittik baǵyttaǵy Hanafi mazhaby – elimizdiń negizgi dástúrli baǵyty. Qazaq eshqashan da musylmandyqtan shettetilgen emes. Shyn mánisinde, kúlli jurtqa tanymal, islam órkenietine úlken úles qosqan, álemdegi ekinshi ustaz atanǵan ál-Farabi men M. Qashqari, J.Balasaǵuni siiaqty birqatar ǵalymnyń qazaq jerinen shyǵýy – osynyń aiqyn kórinisi. Sondyqtan, búgingi urpaq islam dinin qadirlep, ata dástúrin ardaqtaýy tiis. Keibir teris aǵymnyń jeteginde ketkender dástúrge qarsy shyǵyp jatyr,– dei kele, besikke bóleý, balany qyrqynan shyǵarý sekildi dástúrdiń dinmen bailanysyn Quran aiattarynan úzindi oqi otyryp keltirdi.
«Biz eldiń dástúrleri men mádeni muralaryna sáikes keletin dini sanany qalyptastyrýymyz kerek. Osy maqsatta ótken jyldan beri Azmattyq qoǵam institýtynyń bastamasymen «Qazaqstan islamtaný mektebin qaita jańǵyrtý baǵytynda úlken jumys jasap jatyrmyz»,– degen Alaý Shaiqymuly jastar arasynda zamanaýi talapqa sai durys dini túsinikti qalyptastyrý asa qajet ekenin tilge tiek etti.
Oblystyq din isteri basqarmasynyń basshysy Rahmet Esdáýletov Jastar jyly aiasynda óńir jastaryn imandylyqqa tárbieleýde birlesken jobalardy talqylaý, júzege asyrý jolyndaǵy búgingi basqosýdyń ózekti bolyp tabylatyndyǵyn aita otyryp:
- Turǵyndardyń, ásirese, jastardyń dintanýlyq saýattylyǵyn arttyrý, dástúrli dini qundylyqtardy nasihattaý, dini tózimdilikti qalyptastyrý baǵytyndaǵy memlekettik baǵdarlamalar men basym baǵyttardy júzege asyrý jumystaryn júrgizý aiasynda QMDB-nyń óńirlik ókildikterimen birlesken aýqymdy sharalar men jobalar júzege asyrylyp keledi. Elbasynyń «Bolashaqqa baǵdar: rýhani jańǵyrý» baǵdarlamalyq maqalasy aiasynda uiymdastyrylǵan «Rýhani kerýen» jobasyna óńir imamdarynyń qosqan úlesteri zor, – degen Rahmet Razbekuly bir jyl kóleminde atqarylǵan jumystarymen tanystyryp, dini máselelerdi sheshýge yqpalyn tigizip jatqan sharalar jaiynda baiandady. – Ár jyly dini basqarmaǵa qarasty imamdardyń dini, quqyqtyq bilimderin jetildirý maqsatynda interaktivti seminar-treningter, oqytý kýrstary uiymdastyrylady. Ústimizdegi jyly eki óńirde ótken 3 kúndik oqytý seminarynda 151 imam bilimderin jetildirdi.
Konferentsiia barysynda QMDB-nyń qurýshysy ári tuńǵysh tóraǵasy, Eńbekshiqazaq aýdanynyń Qurmetti azamaty Rátbek qajy Nysanbaiulynyń «Tarih. Taǵylym. Ónege» atty kitabynyń tusaýkeseri ótti. Tolyqtyrylyp, ekinshi márte basylǵan kitap islamtanýshylarǵa, sondai-aq, dintanýshylarǵa, tarihshylarǵa, tilin, dilin, ultyn súietin qalyń oqyrmandarǵa arnalǵan. Avtordyń aitýynsha, ǵylym men bilimdi ushtastyrǵan bul kitap – qazirgi ómirdiń bir parasy. Tanymy men taǵylymy mol eńbek jazǵan Rátbek qajy kitap bastyryp shyǵarýǵa qoldaý kórsetken oblys ákimdigine jáne din basqarmasyna erekshe alǵysyn bildirdi.
Jiyn sońynda oblystyq din isteri, jastar saiasaty basqarmasy, QMDB Taldyqorǵan jáne Almaty óńirleri boiynsha ókildikteri arasynda ózara árekettestik týraly tórtjaqty memorandýmǵa qol qoiyldy.
Ásem Jumaqan
