Aqparat jáne qoǵamdyq damý ministriniń buiryǵymen Madiiar Dúisenbaiuly Qojahmet Jastar jáne otbasy isteri komitetiniń tóraǵasy bolyp taǵaiyndaldy. Bul týraly QR Premer-Ministriniń baspasóz qyzmeti habarlady.
Madiiar Qojahmet 1984 jyly Qaraǵandy qalasynda dúniege kelgen. L. Gýmilev atyndaǵy Eýraziia ulttyq ýniversitetin, «Bolashaq» prezidenttik baǵdarlamasy boiynsha Chehiia qoǵamdyq ǵylymdar ýniversitetin támamdaǵan.
2003–2008 jyldary — «Qazaqstannyń jastar kongresi» respýblikalyq jastar uiymynda jumys istedi. Jobalardy úilestirýshiden bastap atqarýshy direktorǵa deiingi eńbek jolynan ótti.
2008–2012 jj. Bilim jáne ǵylym ministrliginiń Jastar saiasaty departamenti direktorynyń orynbasary, direktory, Jastar isi komitetiniń tóraǵasynyń orynbasary boldy.
2012–2014 jyldar aralyǵynda QR Prezident Ákimshiliginiń Memlekettik baqylaý jáne aýmaqtyq-uiymdastyrý jumysy bóliminiń inspektory bolyp jumys istedi.
2014–2017 jj. aralyǵynda Soltústik Qazaqstan oblysy ákimi apparatynyń basshysy qyzmetin atqarǵan.
2017 jylǵy qazannan bastap qazirgi kezge deiin Soltústik Qazaqstan oblysy ákiminiń orynbasary laýazymyn atqardy.
