Almaty tehnologiialyq ýniversitetinde «JasStar» jobasy aiasynda «Jastar jylyna» arnalǵan qalalyq «Jastar – ulttyń basty kapitaly» atty motivatsiialyq forým ótti.
Forýmǵa qonaq retinde Almaty qalasy Almaly aýdany ákiminiń orynbasary A.Bekjanova, «Nur Otan» partiiasy janyndaǵy «Jas Otan» Jastar qanatynyń Almaty qalalyq filialynyń tóraǵasy D.Qasymov, biznes-trener A.Nursila, «Bolashaq» baǵdarlamasynyń túlegi, kardiohirýrg B.Raqyshev, «Jastar úni» Jastar qoǵamdyq birlestiginiń tóraǵasy, Almaty qalasy qoǵamdyq keńesiniń múshesi D.Babamuratov, «100 jańa esim» jobasynyń jeńimpazy, paralimpiadashy S.Esmatov, "Eriktiler ligasy" qoǵamdyq uiymynyń tóraiymy Aisulý Erniiazova qatysty. Sharaǵa Almatydaǵy 38 joǵary oqý oryndary Jastar isi jónindegi komitetteriniń tóraǵalary men olardyń belsendi stýdentteri, Jastar uiymdarynyń kóshbasshylary qatysty.
Forýmdy ATÝ-dyń tárbie jumystary jáne áleýmettik máseleler jónindegi prorektory Qaltai Batholdin júrgizdi. Shara barysynda qatysýshy spikerler ózderiniń jetistikke jetý jolyn stýdentterge aityp berdi. Alǵashqy bolyp sóz alǵan Almaly aýdany ákiminiń orynbasary Ainur Serikqyzy «Jastar jylyna» arnalǵan árbir sharany ákimshilik tarapynan qoldaitynyn aitty. Onyń aitýynsha, Almaly aýdany qalamyzdaǵy stýdentter kóp shoǵyrlanǵan aýdandardyń biri. «Jastar jylynda» búgingi jastardan kúterim mol. Ózim de stýdent boldym. Qazir sizderge barlyq jaǵdai jasalǵan. Elimizdiń órkendeýine óz úlesterińizdi qosýǵa árkez tilekshimiz», - dep spiker Ainur Serikqyzy sózin qorytyndylady.
Budan keiin sóz alǵan «Jastar úni» Jastar qoǵamdyq birlestiginiń tóraǵasy, Almaty qalasy qoǵamdyq keńesiniń múshesi Dáýren Babamuratov jastarǵa erekshe motivatsiia berdi. «Eger búgin áreket etpeseńizder, ómir sizderdiń qastaryńyzdan zý etip ótip ketedi. Qazirgi ata-anańyzdyń ornynda bir kezde siz otyrasyz. Sondyqtan, búgingi isti erteńge qaldyrmaý kerek. Elbasymyz N.Á.Nazarbaev aitqandai, biyl jastarǵa bilim, baspana, otbasy, qyzmet jaǵdaiyna airyqsha kóńil bólinedi. Endeshe, sol múmkindikten aiyrylyp qalmańyzdar! Memlekettiń qýatty bolýy – sizderdiń qoldaryńyzda!» dedi ol.
Kelesi sóz «Jas Otan» JQ AQF tóraǵasy Dýlat Qasymovqa berildi. Onyń aitýynsha, «Jas Otandaǵy» jastar sany artýda. «Biz jastarǵa arnalǵan túrli sharalardy uiymdastyramyz. Sizder de sol sharaǵa atsalysyńyzdar! Árbir eline qyzmet etkisi keletin jas úshin biz qoldaý kórsetemiz! Biylǵy «Jastar jyly» bárimiz úshin de tabysty, sáttilik jyly bolsyn! Maqtanar jetistikterimiz kóbeie bersin!» degen tilegin aitty.
Biznes-trener Ahmetbek Nursila qatysýshy jastarǵa kásip ashýdyń syrymen bólisti. «Kóptegen shet elderde boldym. Qazir kópshilik jastar «parallel» álemde ómir surip jatyr. Bizdiń álem qazir robottardyń qolynda. Bolashaqta kóptegen mamandyqtardyń ornyn robottar basqarady. Sol úshin mamandyq tańdarda muqiiat eskerý kerek. Tek búgingi kúnmen ómir súrýge bolmaidy. Aldaǵy 5 jylǵa jospar qurǵan durys. Qarapaiym dúnieden biznes jasaýǵa bolady. Máselen, meniń shákirtterimniń ishinde matematika kýrsyn ashyp, eki aida 4-5 millionǵa jetip otyrǵan jastar bar. Sondyqtan, biznes ashyp, ózińe tabys keltirýge beiimdelý kerek», - dep biznes-trener Ahmetbek Nursila jastardy jigerlendirdi. Ol óz shákirtteriniń ishinde mol tabysqa jetken 20-24 jastaǵy jastardy forýmǵa ertip, halyq aldyna kórsetti. Bul - qatysýshylardy bir serpiltti.
Kelesi sóz paralimpiadashy Serik Esmatovqa berildi. Aýditoriiamen tyǵyz bailanys jasaý arqyly spiker óz basyndaǵy qiyndyqtarmen qalai kúreskenin aityp berdi. «Bos ýaqyt múlde bolmaý kerek. Adam árqashan ózin jetildirip otyrsa, kúizeliske túspeidi. Meniń eki aiaǵyma da protez salynǵan. Al sizderde eń qiyn problema ne bolýy múmkin? Basyma qiyndyq túskende barlyǵy saǵan aiaýshylyqpen qaraidy. Bul óte aýyr nárse. Sondyqtan, adam basyna túsken kez kelgen qiyndyqpen kúrese bilý kerek. Ózi eńbektense, barlyq nárse qalaǵanyńdai bolady», - dep Serik Esmatov qiyndyqtarǵa qarsy turý joldaryn aitty.
Budan keiin sahnaǵa biylǵy «Jastar jyly» forýmynda Elbasy aldynda sóilegen qatysýshy, "Eriktiler ligasy" qoǵamdyq uiymynyń tóraiymy Aisulý Erniiazova shyqty. «Biz bolashaq balalarymyz úshin qazirden jaqsylyq jasaýymyz kerek. Bul jaqsylyǵymyzdyń qaitarymy mindetti túrde ózimizge keledi. Sol úshin ainalamyzǵa jaqsylyq jasap júreiik!», - dep jastardy jaqsylyq jasaýǵa shaqyrdy.
Qorytyndy sóz kardiohirýrg, «Bolashaq» baǵdarlamasynyń túlegi Baýyrjan Raqyshevqa berildi. «Qazir jastarǵa úlken múmkindik berilgen. Qai salany tańdasańyz da, aqsha tabýdan góri memleket úshin sapaly maman bolýdy oilaý kerek. Men «Bolashaq» baǵdarlamasymen oqyp keldim. Sheteldik memlekettermen salystyrǵanda, bizdiń elimiz belgili bir kezeńnen ótti. Aldaǵy kezeńderden de jaqsy ótýi úshin biz sapaly maman bolyp, halyqqa jaǵdai jasaýymyz kerek», - dedi Baýyrjan Raqyshev.
Forým sońy stýdentterdiń kóńildi kontsertimen aiaqtaldy. Shara jastarǵa motivatsiialyq serpin berip, áserli kezdesý retinde ár qatysýshynyń esinde qaldy.
.jpeg)