«Otbasy bank» AQ ortalyq filialynyń direktory Jansultan Matai jastarǵa arnalǵan turǵyn úi baǵdarlamasy arqyly ipotekanyń qansha teńgege ainalatynyn aityp berdi, dep habarlaidy QazAqparat.
«Qazir Nur-Sultan men Almatyda jergilikti atqarýshy organdardan jastarǵa arnalǵan turǵyn úi baǵdarlamasyn ashý usynystary túsip jatyr. Bul baǵdarlama boiynsha turǵyn úi baǵasy – shamamen 13 mln teńge. Bul baǵa qaidan shyqty? Birinshiden, baǵdarlama qabyldanǵan kezde bastapqy jáne qaitalama naryqtardaǵy bir bólmeli páterdiń naryqtyq baǵasy sharshy metrine 280-320 myń teńge aralyǵynda boldy jáne esepteý kezinde osyndai soma shyǵaryldy», - dedi Jansultan Matai Ortalyq kommýnikatsiialar qyzmetinde ótken baspasóz máslihatynda.
Spiker osy baǵdarlama boiynsha bir bólmeli páterge ai saiynǵy ipotekalyq tólem qansha bolatynyn aityp berdi.
«Eger osy baǵdarlama aiasynda 13 mln teńgege ipoteka rásimdelse, ai saiynǵy tólem shamamen 101 myń teńge bolady, bastapqy jarna 10% quraidy. Bul esepteýler ai saiyn páterdi jalǵa alýǵa ortasha eseppen 100 myń teńge jumsalatynyn eskere otyryp júrgizildi jáne ipotekany rásimdeý kezinde tólemder somasy osy shekten aspaityn bolady», - dep túsindirdi Jansultan Matai.
