Qaladaǵy karantinniń jeńildeýine bailanysty, Almaty ziialylary jastarǵa jaýapty bolýdy jáne sanitarlyq talaptardy saqtaýdy jalǵastyrýdy surady, dep habarlaidy QazAqparat.
Aqyn, QR Memlekettik syilyǵynyń laýreaty, «Qurmet» jáne «Parasat» ordenderiniń iegeri Temirhan Medetbek jastar ózderine, týǵan-týystaryna jáne qoǵamǵa janashyrlyq tanytýy kerek dep esepteidi.
«Dárigerlerdiń jumysynyń, halyqtyń sanitarlyq erejelerdi saqtaýynyń arqasynda indet taraýy tejele bastady. Biraq onyń saldary az emes jáne kez-kelgen ýaqytta órship ketýi múmkin. Ár adam abai bolýy kerek. Karantin talaptaryn odan ári de muqiiat bolǵan jón. Merekelerdi uiymdastyrýdan aýlaq bolǵan durys. Ásirese jastar nemqurailylyq tanytpaýy kerek. Jastar ózderine, týǵan-týystaryna, qoǵamǵa janashyrlyq tanytýy kerek. Jastardy shydamdylyqqa shaqyramyn. Bolashaq jastardyń qolynda, sondyqtan olar 10 ese jaýapty jáne muqiiat bolýlary tiis. Barlyq almatylyqtarǵa jaqsylyq, amandyq tileimin!», — dedi Temirhan Medetbek.
Óz kezeginde, tanymal prozashy, dramatýrg, pýblitsist, synshy, Qazaqstan Jazýshylar odaǵynyń múshesi, QR Eńbek sińirgen qairatkeri Ahmetjan Áshirov almatylyqtardy karantin rejiiminiń jeńildetilgenine qaramastan, sanitarlyq talaptardy qatań saqtaýǵa shaqyrdy.
«Qazir karantin bitti dep aita almaimyz. Bul indet áli joiylǵan joq, sol sebepti bárimiz, jas ta kári de, betperde taǵyp júrýimiz kerek. Ol ózimiz úshin, bir-birimizdi qorǵaý úshin qajet. Karantin áli de bar. Bul ýaqytsha shara dep esepteimiz. Maska taqpai júretin kúnder alys emes dep oilamyz. Biz, úlkender aitqan aqyldy jastar tyńdaýy kerek. Saqtyq sharalary ózimiz úshin, balalarymyz, analarymyz ben jaqyndarymyz úshin, densaýlyǵymyz jaqsy bolyp, ómirdi jaqsy ótkizý úshin qajet. Karantin erejesiniń jeńildetilgenine biz qýandyq. Kóp uzamai indet joǵalyp, Úkimet bolyp, el bolyp, elimiz úshin burynǵydai eńbek etemiz dep oilaimyn. Al qazirgi tańda, karantin erejesin ustanyp, saqtyq sharalaryn qoldanyp, talap pen keńesterge baǵynyp júrýimiz qajet. Bul sharanyń barlyǵy ortaq igilikter úshin qolǵa alynyp jatyr», – dedi Ahmetjan Áshirov.
