Qazaqstan halqy Assambleiasynyń «Jańa tolqyn 100+» Future-forýmynda eldiń ár óńirinen kelgen jastar Start-up jobalaryn usyndy. Assambleianyń bul aidaǵy sharasy 19 maýsym kúni Kókshetaýdaǵy «Qazaqtaný» ǵylymi-aǵartýshylyq jobasyn saltanatty bastaý rásimimen ashylǵan edi. Joba Qazaqstan etnostarynyń arasynda qazaq halqynyń tarihyn, dástúrlerin, gýmanitarlyq jáne adamgershilik printsipterin dáripteýge baǵyttalǵan. Al búgingi Start-up jobalardyń maqsaty – jastardyń áleýmettik ómirine jiger berý.
Búgin barlyǵy 14 joba tanysytyryldy. Ereje boiynsha jobalar «pecha-kýcha» stilinde, iaǵni 6 minýt 40 sekýndtan aspaityn ýaqytta qorǵaldy. QHA tóraǵasynyń orynbasary Leonid Prokopenko alǵy sózinde jastarmen jumys isteý Assambleianyń beldi baǵyttarynyń birine ainalyp kele jatqanyn aityp ótti.
– Forýmnyń aty aityp turǵandai shara ózin-ózi damytýǵa júzden asa qadam, júzden astam jańa ideia men jańa startaptar, júzden kóp jańa dostar men jańa kitaptar, sondai-aq júzden joǵary jańa qadam alyp keledi. Jastar innovatsiia, básekelestikke qabilettilik pen pragmatizmdi boiyna tez sińire alady. Forýmǵa qatysýdaǵy tájirbie men jańa startaptardy izdeý olarǵa serpilis beredi dep úmittenemiz, – dedi L.Prokopenko.
Almaty qalasynyń stýdenti Viktoriia Stremetskaia qazaqstandyq naryqty teńiz ónimderimen baiytýdy usyndy. Almaty energetika jáne bailanys ýniversitetinde oqityn startaper asshaian ónimin keńeitý kerek deidi.
– Ol úshin kóp nárse kerek emes. Bar bolǵany basseini men súzgishi bar arnaiy jabdyqtalǵan oryn bolsa jetkilikti. Asshaiandardy ósirý 10-12 aiǵa sozylady, al bul ýaqytta 1,5 tonna teńiz ónimin óndirýge bolady, – deidi Viktoriia.
Abai Otarbaev esimdi qaraǵandylyq jas PIK (páter ieleriniń kooperativi) jumysyn jaqsartýǵa baǵyttalǵan Workapp jobasyn tanystyrdy. Abai joba boiynsha SmartJKH qosymshasyn jasap, ainalymǵa engizip qoiǵan. Jobaǵa úzilissiz jumys isteitin Call-ortalyqtar kiredi. Ony júzege asyrý úshin Abai Otarbaev PIK pen ákimdikpen bailanys jasap jatyr. Qosymsha qalai jumys isteidi?
– PIK-ke baǵyttalǵan barlyq ótinishter men qońyraýlardy jinap, túgel jaýap berip shyǵamyz. PIK-ke qatysty saýaly ne problemasy bar kez kelgen turǵyn bizge qalaǵan ýaqytynda habarlasa alady. Bizdiń dispetcherler suraqqa jaýap berip, ótinishin tirkeidi. Turǵynǵa mindetti túrde problemanyń sheshimi habarlanady, – deidi joba avtory.
Tipti jeke mamandy jaldaýǵa bolatyn saity da bar eken. Ázirge ortalyq Qaraǵandydaǵy 100 úige qyzmet kórsetip otyr. PIK-ke qatysty kóp túitkildi mundai jolmen sheshý qordalanǵan biraz probelmany sheshýge kómektesipti.
Qazir oiynshyq úilerdiń dáýiri júrip turǵan kez. Eger onyń jedelsatysy bolsa, onda úidi ádettegilerge qaraǵanda eki ese qymbatqa alasyz. Ári ekologiialyq jaǵynan paidaly deýge kelmeidi. Olai bolsa oiynshyq úilerdi nege keregesi, bosaǵasy, ýyǵy, shańyraǵy tutastai aǵashtan jasalǵan, kiizi taza tabiǵi qoidyń júninen basylǵan kiiz úige almastyrmasqa?! Aidar Beksultanov esimdi jas ónertapqysh balalardy ulttyq dástúrmen tárbieleýdi jón sanaidy. Sol úshin de balalarǵa arnalǵan qazaqy kiiz úi jasap shyǵarypty. Babasy turǵan kiiz úimen dos balǵan oiyn balasy kiiz úidiń rýhyn sezine alar edi dep oilaidy.
– Eger joba sarapshylar men investorlar tarapynan qoldaý taýyp ketse, toqý stanoktaryn satyp alyp, kásibimdi keńeitemin deidi, – almatylyq jas.
Shara barysynda «Qazaqstannyń 100 jańa esemi» jobasynyń jeńimpazdary jetistiginiń qupiiasymen bólisti. Sonyń biri 18 jasynda magistratýrany bitirgen kompozitor, pianist, halyqaralyq baiqaýlardyń jeńimpazy Rahat-bi Ábdisaǵyn alǵan bilimdi qalai paidalaný keregin aityp berdi.
– Saǵat tilin alaiyqshy. Onyń soǵyp turýy úshin júzdegen bólshekter qajet. Olar qanshalyqty myqty bolsa da bólshek kúiinde qalady. Saǵat tiliniń ainalýy úshin saǵatshy qajet. Ol sonsha bólikti jinap, parametrlerin retteidi. Tek sonda ǵana álgi shashylǵan bólikter ýaqytty kórsetetin bir fýnktsiialy mehanizmge ainalady. Kitap qoryńnyń da, alǵan bilimniń de moldyǵy artyqtyq etpeidi. Alaida artyq bilim – ýaqyt óte kele adamnyń tulǵalyǵyn joiatyn psihologiialyq júk. Bul kezde adam joǵaryda aitqan saǵatshyǵa ainalýy tiis. Bilimdi jinap qana qoimai, belgili bir potentsialǵa ie bolyp, kózdegen maqsatqa jetý úshin ikemdeý kerek, – dedi daryndy mýzykant.
Ult portaly
Foto: egemen.kz
