Ońtústik Qazaqstan oblysynda «Týǵan jerdi túletken azamattar» jobasy aiasynda jastar jergilikti kásipkerlermen kezdesti.
Oblystyq «Otyrar» ǵylymi-ámbebap kitaphanasynda ótken júzdesýde isin dóńgeletken biznes ókilderi kásip ashý men tabys tabýdyń qyr-syryn úiretti, dep habarlaidy QazAqparat tilshisi.
Basqosýdaǵy maqsat - otandyq ónimdi qoldaý men nasihattaý, ony óndiretin eńbek adamdaryn dáripteý men jastarǵa kásiptik baǵdar berý boldy. Osy jolda oblys ekonomikasyna ólsheýsiz úles qosyp otyrǵan isker azamattar jas býyn ókilderimen kezdesti. Jinalǵandar kásipkerliktiń qyr-syry týraly emin-erkin suhbattasty. Tabys tabý turǵysynda oi-pikirlerimen almasty.
Qazirgi tańda óńirde kásipkerliktiń aiasy keńeiip, qarqyndy damyp keledi. Basqosýda sóz sóilegen kásipkerlerdiń aitýynsha, biznes júrgizý bastapqy kezde qiyn bolǵanymen, qazir memlekettik tarapynan jeńildikter men qoldaý kóp.
«Elbasynyń kásipkerlikti qoldaý baǵytyndaǵy indýstriialyq-innovatsiialyq damý baǵdarlamasynyń arqasynda óndiris aiasy keńeiip, fabrikamyz «Qazaqtyń tól ónimi» dep maqtanýǵa turatyn túrli kilemder toqidy. Jetistigi de jeterlik. Búginde ónerkásip ornynda kilemniń júzden astam túri shyǵady. Sol úshin jastarǵa kásibin ashýdan qoryqpastan, kásipkerlikti úirenýge shaqyrar edim», - dedi jergilikti kilem fabrikasynyń quryltaishysy Qarlyǵash Áýezhanqyzy.
Jalpy, kitaphanadaǵy kezdesýdiń jastar úshin paidasy kóp boldy. Jinalǵandar kásipkerlik jóninde kóp maǵlumattar alyp, oi túiindedi.
