Jastar kvotasy partiialyq tizimde mindetti túrde bolýy kerek. Bul týraly tiisti Konstitýtsiialyq zań jobasyn talqylaý kezinde Májilis tóraǵasy Nurlan Nyǵmatýlin málim etti, dep habarlaidy QazAqparat.
«Bul suraq jalpy qoǵamda jáne jumys tobynda kóp talqylandy. Birinshiden, kóptegen elderde sailaý partiialyq tizimde jastarǵa arnalǵan kvota mindetti túrde bekitilgen. Ekinshiden, qai kezde qandai qoǵamda bolsa da, jastarǵa degen senim óte zor. Árine, jastardyń ómirlik tájiribesi azdaý bolýy múmkin, biraq ta olardyń zamanǵa sai ideialary, usynystary óte kóp. Qazaq halqy osyndaida «asyl tastan, aqyl jastan» deidi. Meniń oiymsha, jastar kvotasy partiialyq tizimde mindetti túrde zań boiynsha bolýy kerek», - dedi Nurlan Nyǵmatýlin Parlament Májilisiniń jalpy otyrysynda.
Osy oraida ol tyń usynystar qabyldaý úshin jastardy belsendi tartý kerektigin atap ótti.
Budan buryn habarlanǵandai, Májilistiń jalpy otyrysynda Qazaqstan Respýblikasyndaǵy sailaý týraly» Qazaqstan Respýblikasynyń Konstitýtsiialyq zańyna tolyqtyrýlar engizý týraly» Konstitýtsiialyq zańynyń jobasy maquldandy.
«Zań jobasymen partiialyq sailaý tizimderinde áielder men jastar úshin 30 paiyz kvotany qarastyrý usynylady. Osy maqsatta, Sailaý týraly Konstitýtsiialyq zańda áielder men jastarǵa arnalǵan kvotalardy partiialyq tizimge engizý týraly talap qoiylatyn bolady», - dedi Ádilet ministri Marat Beketaev.
