sýret ashyq derekkózden alyndy
Májiliste ótken Úkimet saǵatynda Ǵylym jáne joǵary bilim ministri Saiasat Nurbek jastardyń ǵylymǵa nege az baratynyn túsindirdi, dep habarlaidy Sputnik Qazaqstan.
Ǵylym ministrligi jas ǵalymdarǵa qatysty úlken taldaý júrgizgen.
"Biz nege PhD ǵylymi dárejesine granttar berip jatyrmyz? Jastar PhD-di qorǵai almai ketedi nemese PhD dárejesin qorǵap, joǵary oqý oryndaryna ne ǵylymi zertteý instýttaryna barmaidy nemese onda 1-2 jyl ǵana jumys istep, ketip qalady. Jastar ǵylymǵa az keledi. Osy máseleni zerttegende shekteýler baryna kózimiz jetti", - dedi Nurbek Májiliste ǵylym taqyrybyna arnalǵan úkimet saǵatynda.
Ministrdiń aitýynsha, sol shekteýlerdiń biri – PhD dárejesin qorǵaý úshin halyqaralyq bedeldi jýrnaldarǵa maqala jariialaý kerek. Ekinshiden, jas ǵalym PhD qorǵap, joǵary oqý ornyna kelgende ol oqyǵan 4 jyl eseptelmeidi.
"Ol aǵa oqytýshy, professor, qaýymdastyrylǵan professor (dotsent) laýazymyna konkýrsqa tapsyra almaidy. Sondyqtan olar qinalady, jalaqy da az. Kúndelikti ómirdegi máseleler bastalady. Osylaisha, olar ǵylymnan ketip qalady", - deidi Nurbek.
Osyǵan bailanysty ministrlik 2021 jyly qabyldanǵan zańnyń aiasynda jas ǵalymdarǵa granttar bere bastady.
"Bul – jas ǵalymdardy aiaǵynan turǵyzatyn shara. Munda 3 jyldyq baǵdarlamaǵa, iaǵni osy grant aiasynda 500 myń teńge ailyq kózdelgen. Oǵan 2013 jyldan bastap PhD ǵylymi dárejesin qorǵaǵandar qatysa alady. Sońǵy eki jylda 3 konkýrs jariialadyq. Nátijesinde 881 ǵylymi joba qatysyp, jas ǵalymdarymyz grant utyp aldy", - deidi vedomstvo basshysy.
Saiasat Nurbektiń aitýynsha, ministrliktiń maqsaty – jyl saiyn osy joba aiasynda myńǵa jýyq grant berip, jas ǵalymdarǵa qoldaý kórsetý.
