Elimizde alǵash ret qoǵamnyń álsiz toptaryn jumysqa tartý maqsatynda jastar korpýsyn damytý jobasy júzege asyrylyp jatyr, dep habarlaidy Ult.kz tilshisi.
Máselen, Ońtústik Qazaqstan oblysy Kentaý qalasynyń órenderi «ZHASPROJECT»-ke qatysyp, 18 jobany utyp alǵan. Al, osy baǵytta kásibin bastaǵandarǵa grant bólinip, shákirtaqy tólenedi.
Jergilikti jastar ortalyǵyndaǵy qyz-jigitter shetinen talapty. Árqaisysy – bir-bir jobanyń avtory. Búginde topqa birigip, jumys istep jatyr. Aidana Joraeva esimdi jas talap zaǵip jandar úshin aýdio-jýrnal shyǵarýdy qolǵa alǵan. Mysaly, «Álemdi seziný» dep atalatyn jobanyń buryn-sońdy elimizde balamasy bolmaǵan.
"Biz zaǵip jandarǵa arnalǵan aýdio-jýrnaldar shyǵarýdamyz. Bizdiń diskilerimiz erlerge, názik jandylarǵa jáne balalarǵa arnalǵan bolyp bólinedi. Qazir barlyq málimetterdi daiyndap, basýǵa daiyndalýdamyz", - deidi «Álemdi seziný» jobasynyń avtory Aidana Joraeva.
Kózi nashar kóretin azamattar aýdio jýrnalǵa qandai málimet kerektigin ózderi usynypty. Al joba avtory bolsa, ónimin bastapqy 5 ai tegin taratpaq. Sebebi «ZHASPROJECT» sharty solai. Mundaǵy múmkindigi shekteýli jandardyń ómirge talpynysyn, olardyń balalarǵa arnap jasaǵan ulttyq naqyshtaǵy sómkelerinen, adamnyń oi órisin damytýǵa arnalǵan boiamaqtary jáne kitapshalar daiyndaýynan ańǵarýǵa bolady.
"Mundaǵy maqsatymyz – jastardy qoldap, qýattaý. Áleýetin arttyrý. Óz kásibin ashýǵa múmkindik berý. Kentaý qalasy osyǵan qatysty 18 jobany utyp aldy. Oblys boiynsha alǵashqy orynnyń qatarynda", - Kentaý qalalyq jastar ortalyǵynyń basshysy Qanat Bekmetov.
Kentaý shaharynda qus fermasy neken-saiaq. Al jas kásipker Sultan Azat osy olqylyqtyń ornyn toltyrýǵa kirisip ketken. Jobaǵa qatysqan ol 1 million teńge utyp alyp, shaǵyn qus ósirý kásipornyn ashady. Onyń qorasynda qazir 100 taýyq bar. Jumyrtqasyn az qamtylǵan otbasylarǵa tegin taratady.
" «ZHASPROJECT» jobasy – bolashaq jastarǵa degen ómirge qadam. Qudai qalasa, úlken ferma ashyp, Kentaýdy jumyrtqamen qamtamasyz etem degen oidamyn", - deidi qus fermasy jobasynyń avtory Sultan Azat.
Birligi jarasqan isker jastardyń urany bir. Ol - «Armanda! Usyn! Iske asyr!».
