Foto: AMANAT partiiasy
Búgin Parlament Májilisiniń jalpy otyrysynda Oqý-aǵartý ministri qyzmetine taǵaiyndalǵan Juldyz Súleimenovanyń ornyna kelgen jańa depýtat Ábýtálip Mútáli ant berdi.
Buǵan deiin AMANAT partiiasynyń Saiasi keńes biýrosy Májilistegi partiialyq tizim boiynsha bosaǵan mandatty Prezidenttik jastar kadr rezerviniń múshesi Ábýtálip Mútálige berý týraly sheshim qabyldaǵan bolatyn.
Ant berý rásimi kezinde depýtat:
– Qazaqstan halqyna adal qyzmet etýge, elimizdiń tutastyǵy men táýelsizdigin nyǵaitýǵa, Konstitýtsiiasy men zańdaryna qatań baǵynýǵa, depýtat retinde ózime júktelgen mártebeli mindetterdi adal atqarýǵa ant etemin, – dedi.
AMANAT partiiasy taratqan aqparatqa sáikes, Ábýtálip Mútáli «Bolashaq» halyqaralyq baǵdarlamasynyń túlegi. Ol buǵan deiin tsifrlyq tehnologiialar men jasandy intellekt salasynda qyzmet atqarǵan.
Jańa depýtat Májilistiń Ekonomikalyq reforma jáne óńirlik damý komitetiniń quramyna endi.
Aita keteiik, búgingi jalpy otyrysta zań men tártip ústemdik etetin qoǵam qurýdy maqsat etetin zań jobasy talqylanyp jatyr.
