Edmond Belamidiń portreti byltyr 432 myń dollarǵa satyldy. Eshkimge belgisiz adamdy beinelegen sýret nege sonshalyqty qymbatqa satylǵan? Bul aqparatty estigende, sizde shamamen osyndai suraq týyndaýy múmkin. Al jaýaby mynaý – bul algoritmniń kómegimen salynǵan sýret. Algoritmde 14-20 ǵasyrlar arasynda salynǵan 15 myń portrettiń derekteri qoldanylǵan.
«Christie's» aýktsion úii uiymdastyrǵan bul saýda basqa da máselelerdiń shetin shyǵarǵandai boldy. Adamǵa tán sezimderden jurdai kompiýter ónerpaz bola ala ma? Bul portretti óner týyndysyna jatqyzýǵa bola ma? Al eger jurt osy úshin qomaqty aqsha tóleýge daiyn bolsa, bul suraqty qoiýdyń mán bar ma?
Qarqyndy damyp kele jatqan jasandy intellekt adam oi-órisiniń deńgeiine jetse ne odan asyp ketse, ónerpazdar men shyǵarmashylyq salasynyń kúni ne bolmaq?
Buǵan deiin algoritmder óleń de shyǵaryp, mýzyka da jazǵan. Sonda algoritm óner týyndylaryn jasap shyǵara ala ma degen suraq eriksiz týyndaidy. Bilim tanýdy zertteitin neirobiolog Romi Lorentstiń aitýynsha, bul suraqqa jaýap berý úshin aldymen «ónerpazdyq» uǵymyn qalai túsinetinimizdi anyqtap alý kerek.
«Eger ónerpazdyq máseleni sheshýdiń jańa amaldaryn tabý dep qabyldasaq, onda jasandy intellekt mundai deńgeige jetti», - deidi Romi Lorents. Osy rette neirobiolog Google korporatsiiasynyń enshiles DeepMind kompaniiasyn mysalǵa keltirip otyr.
2017 jyly DeepMind kompaniiasy jasap shyǵarǵan jasandy intellekt óte kúrdeli logikalyq Go oiynynda eń úzdik oiynshyny jeńip ketken. Birneshe kúnde ol jańa ailalar men innovatsiialyq strategiialardy meńgergen.
«Google kompaniiasy bul jeńisti ónerpazdyqqa jatqyzar edi. Óitkeni jasandy intellekt buryn kezdespegen máseleni sheshýdiń jańa joldaryn tapty», - deidi Romi Lorents.
Alaida óner máseleni sheshýdiń jańa amaldaryn tabýmen ǵana shektelip qalmaityn bolsa she?
Virtýaldyq álemdegi oiyndardy shyǵarý – jasandy intellekttiń ónerpazdyǵyn synaýǵa laiyq alań ekeni sózsiz.
«Biraq algoritm adamnyń qatysýynsyz birdeńe jasasa, munyń nátijesi qyzyqsyz bolady», - deidi kompiýterlik ǵylymdar professory Djýlian Togeliýs.
Qazirde algoritmderdiń neshe túrli oiyndar jasaýǵa qabileti bar, biraq adam olardan tez jalyǵyp ketedi.
Professor ǵarysh keńistigin zertteitin No Man's Sky kompiýterlik oiynyn mysalǵa keltiredi. Munda algoritmniń kómegimen 18 kvintillion ǵalamshar jasalǵan. Oiynda «protsedýralyq generatsiia» tehnologiiasy qoldanylady. Sonyń kómegimen avtomatty túrde jańa álemder qurylady. «No Man's Sky oiynynda neshe túrli ósimdikter men janýarlary bar kóptegen ǵalamshardy zertteýge bolady. Ol tehnikalyq jaǵynan alǵanda úzdik týyndy. Biraq ony oinaý qyzyq emes.
Oiynda keremet algoritmder qoldanylǵan. Olar óte kóp zat istei alady. Biraq bul oiynshylarǵa qyzyq emes, óitkeni adamdar únemi óz betinshe birdeńe istegisi kelip turady», - deidi Djýlian Togeliýs.
Romi Lorents naǵyz ónerpazdyq máseleni sheshýde tapqyrlyq tanytýdan bólek ekenin aitady.
«Kórkem shyǵarmashylyq adam ishindegi oilardy naqty bir zatqa ainaldyrady. Ol máselen, mýzykalyq týyndy ne músin bolýy múmkin. Bul qiialyńdaǵy dúnieni naqty bir nysan túrinde shyǵarý qabileti. Al jasandy intellekttiń ishki jan-dúniesi bolmaidy. Sondyqtan da ol adamdar sekildi boiyndaǵy úreiin ne tilegin beinelei almaidy. Sondyqtan búkil isti jasandy intellektke tapsyrýdan góri ónerpaz adamdardyń mashinalarmen birlesip jumys isteýi jemisti bolmaq», - deidi Romi Lorents.
Mýzykant ári Sasseks ýniversitetiniń mamany Elis Eldridj jasandy intellektti «dóńgelek ne ishki janý qozǵaltqyshy sekildi oilap tapqan quraldarymyzdyń biri» retinde qarastyrýdy usynyp otyr.
Ol ózdiginen oinaityn violonchel jasaýǵa kómektesti. Mýzykalyq aspap elektr kúshimen jabdyqtalǵan jáne onda beiimdelgen algoritm qoldanylǵan.
«Klassikalyq violonchelde oinaǵan kezde ysqymen jumys isteý kerek. Al jańa qurylǵy ózdiginen mýzyka shyǵarady. Bul mýzykalyq aspaptarǵa jáne jalpy jańa tehnologiialarǵa qatysty ózgeshe kózqaras qalyptastyrady», - deidi Elis Eldridj.
Londondaǵy UAL Creative Computing Institute qyzmetkeri Mik Griersonnyń pikirinshe, jasandy intellekt ónerdi damytýǵa septigin tigizip, jańa úlgilermen isteitin ónerpazdar ben shyǵarmashylyq ortalardyń qurylýyna ákeledi.
2016 jyly Sigur Rós skandinaviialyq toby baǵdarlamalyq jasaqtamanyń kómegimen ánderiniń biriniń jańa nusqasyn shyǵardy. Ol án toptyń Islandiia boiynsha jasaǵan 24 saǵattyq sapary kezinde oryndalǵan.
Roxy Music, Coldplay, Devid Boýi sekildi tanymal tulǵalarmen jumys istegen innovatsiialyq kompozitor ári prodiýser Braian Ino da mýzykalyq shyǵarmalarynda algoritmderdi qoldanǵandy unatady.
Massive Attack toby da Mezzanine atty albomyn jańadan óńdeý kezinde jasandy intellekttiń kómegine júgingen. Jańa albom neirondy jeli retinde usynylady. Sonda Barbikanda ótetin kórme kelýshileri qimyldary arqyly dybystardy ózgerte alatyn bolady.
Jasandy intellekt óner adamdarynyń qyzmetine qaýip tóndirgenimen, tehnologiia olarmen básekeles bola qoimas.
Paida kórmek bolǵandar jasandy intellektti adamdardyń shyǵarmashylyq qabiletin tómendetý úshin qoldanýy múmkin. Biraq bul úshin tehnologiialar emes, adamdardyń ózderi jaýapty.
Mádenietti qalyptastyratyn adamdar. Bul máselede tehnologiia eshqashan da adamnan asyp túse almaityny anyq.
Maqalanyń túpnusqasy: bbc.com
