«Qazaqstannyń meditsinalyq volonterleri» birlestiginiń tóraǵasy Abylaihan Ábdirásh Volonterler jyly kópke kómek qolyn sozyp, mektep oqýshylaryna alǵashqy meditsinalyq kómek boiynsha sabaq ótkizýdi josparlap otyr, dep habarlaidy QazAqparat.
23 jastaǵy elordadaǵy Meditsinalyq ýniversitetiniń 7-shi kýrs stýdenti 5 jyldan beri volonter. «Paida oilama, ar oila» degen Abaidyń naqylyn keltirgen Abylaihan qoǵamnyń damýyna úles qosýdy maqsat tutatynyn aitady.
«Ár adamnyń ómirde maqsaty bolýy kerek. Qolyńyzdan kelse ainalaǵa kómek kórsetýge tyrysqan abzal. Eger qoǵamdaǵy qyzmettiń bári aqyly bolyp ketse, adami qundylyqtar ekinshi orynǵa ysyryla ma dep qorqam. Biletinimizdi ózimizden keiingi býynǵa úiretip júrsek, adal eńbek etsek, biz óz arymyzdy taza ustai alamyz degen oidamyn», - dedi QazAqparat tilshisimen áńgimelesken Abylaihan Ábdirásh elordada «Birgemiz» respýblikalyq front-keńsesiniń ashylý saltanatynan keiin.
Jas stýdent ózin erikti emes, volonter dep ataýdy jón kóredi eken.
«Ókinishke qarai, bizdiń qoǵamda erikti degendi «erikken» sózimen bailanystyra uǵatyn da, aityp júrgender de bar. Volonterler jylynda búgin front-keńsemizdi ashyp otyrmyz. Odan bólek qazirgi tańda ártúrli volonterlik uiymdarǵa kishi granttar bólinip jatyr. Búkil Qazaqstan boiynsha 300 myń teńge kóleminde 68 grant bólinedi. Sol granttardy ártúrli volonterler óz salasyna paidalana alady. Mysaly meditsina volonterlerine ne qajet? Bizge ártúrli alǵashqy kómektiń qobdishasynan bastap tanometrge deiin qajet. Biz sondai kerekti zattardy satyp alyp, halyqqa kómektesip, úlken paidamyzdy tigize alamyz», - deidi ol.
Abylaihan Ábdirásh jolǵa qoiylǵan stýdenttik kredit jobasyn paidaǵa jaratpaq.
«Iaǵni men belgili bir vakansiia ashyp, bir mektepke baryp alǵashqy meditsinalyq kómekti sabaq retinde ótkize alamyn. Ol baǵdarlama 20 nemese 50 saǵattyq bolýy múmkin. Maǵan volonterler kelip, birge jumys isteýge niet bildirse, men ony qabyldap alyp, ol menimen birge ártúrli mektepte volonterlik qyzmetin júrgize alady. Seriktesimniń tiisinshe shákirtaqysyna qosyp aqsha tóleýge bolady. Bir volonter jylyna 70 saǵattyq stýdenttik kreditin ótei alady. Menińshe, elimizde volonterler kóp. Tipti olar ózderiniń volonter ekenin bilmeýi de múmkin. Sebebi biz qazaq degen bir-birine kómek qolyn sozýǵa daiyn turatyn, asarlatyp úlken is tyndyratyn halyqpyz», - deidi ol.
Aita ketsek, elordada Prezident Qasym-Jomart Toqaev elordada EKSPO kórmesiniń «Art Hub» pavilonynda ornalasqan volonterlerdiń «Birgemiz» respýblikalyq front-keńsesiniń ashylý saltanatyna qatysty. Front-keńse búkil Qazaqstannyń volonterleri úshin keńes berý, ádistemelik, oqytý jáne aqparattyq ortalyqqa ainalatyn bolady. Sondai-aq, ol volonterlik jobalar men oqytý baǵdarlamalaryn úilestirý, monitoring jasaý, volonterlikti ilgeriletý boiynsha biryńǵai aqparattyq saiasatty júrgizedi jáne biryńǵai Call-ortalyqtyń jumysyn uiymdastyrady.
.jpeg)