Jetisý jeriniń barlyq aýdandary men qalalaryndaǵy orta mektepterde «Adal urpaq» atty erikti mektep klýbtary qurylyp, jasóspirimderge jemqorlyq, paraqorlyq syndy jaǵymsyz ádetterdiń ziianyn uǵyndyrýǵa kirisýde. Erikti mektep klýbtarynyń qurylǵanyna bir jyl tolýyna orai QR Memlekettik qyzmet isteri jáne sybailas jemqorlyqqa qarsy is-qimyl agenttiginiń Almaty oblysy boiynsha departamenti Taldyqorǵan qalasynda oblystyq slet ótkizdi.
«Adal urpaq» erikti mektep klýbtarynyń alǵash ret ótkizip otyrǵan sletine Jetisý jeriniń 16 aýdany men 3 qalasynan 200-den astam oqýshy qatysyp, kópshilikke óz ónerlerin pash etti. Eń aldymen Ult kóshbasshysy N.Á. Nazarbaevtyń monýmenti janyna jinalǵan jasóspirimderdi quttyqtaǵan QR Memlekettik qyzmet isteri jáne sybailas jemqorlyqqa qarsy is-qimyl agenttiginiń Almaty oblysy boiynsha departamentiniń basshysy Serikbai Nurǵisaev, M. Tynyshpaev atyndaǵy oblystyq ólketaný mýzeiiniń aǵa ǵylymi qyzmetkeri Baýyrjan Qurban jasóspirimderdiń bolashaǵy jarqyn bolýyna tilektestikterin bildirdi. Odan soń oblystyq jiynǵa qatysýshylar Elbasyna, týǵan el men jerge arnalǵan patriottyq óleńderin oqyp, ózderin tolǵandyrǵan oilaryn áńgimeledi. Aqsý aýdany, Jansúgirov aýyly, E. Siqymov atyndaǵy orta mektebi janyndaǵy internattyń 11-synyp oqýshylary Anel Bidahmet, Saia Moldajan ózderi jazǵan óleń shýmaqtaryn oqysa, Taldyqorǵan qalasyndaǵy №14 orta mektebiniń 9 synyp oqýshysy Saiat Sanjaryq sletke jinalýshy oqýshylarǵa «Meniń alǵysym» atty esse arnady.
Ashyq aspan astynda ótken saltanatty jiyndy Súiinbai atyndaǵy oblystyq filarmoniia ánshileri ánmen ádiptedi.
Budan soń sletke qatysýshylar oblys ákimdiginiń ǵimaratyn aralap, ákimdik qyzmetkerleriniń jumysymen tanysty. Ǵimarat jaiynda oblys ákimi apparaty basshysynyń orynbasary Marjan Murat áńgimelep, ákimdiktiń májilis zalynda ótetin jiyndardyń mazmunyn túsindirdi. Onyń aitýynsha, 1932 jyly salynǵan ǵimaratqa osy ýaqytqa deiin mektep oqýshylary múlde kirmegen. Alǵash qadam basqan túlekterdiń keleshegi jarqyn, ómirleriniń ónegege toly bolýyn tilegen ákimdik qyzmetkerleri belsendi jasóspirimdermen estelik sýretke tústi.
Arnaiy bólingen kólikterge otyrǵan slet qatysýshylary Oqýshylar saraiyndaǵy shyǵarmashylyq, ǵylymi-tehnikalyq úiirmelerdiń jumysymen tanysty. Odan ári oblys ortalyǵyndaǵy sáýleti erekshe ǵimarattardyń biri – jańa kórme ortalyǵynyń aldynda ótkizilgen flesh-mobqa qatysyp, ónerlerin pash etti. Jasóspirimderge «Baldáýren» respýblikalyq saýyqtyrý ortalyǵynyń uiymdastyrýshy ustazdary buqaralyq sharalardy uiymdastyrý, aýditoriiamen jumys, kópshilik aldynda sóz sóileý syndy qabiletterdi ushtaý boiynsha sheberlik saǵattaryn ótkizdi.
Tús aýa jastar I. Jansúgirov atyndaǵy Mádeniet saraiyna jinalyp, saltanatty jiynǵa qatysty. Alǵashqy bolyp sóz alǵan Qazaqstan Respýblikasy Memlekettik qyzmet isteri jáne sybailas jemqorlyqqa qarsy is-qimyl agenttiginiń Almaty oblysy boiynsha departamentiniń basshysy Serikbai Nurǵisaev «Adal urpaq» mektepterdegi erikti klýbtar arqyly óskeleń urpaqty adamgershilikke, patriottyq sezimge tárbieleý, olardyń boiynda sybailas jemqorlyqqa qarsy mádenietti qalyptastyrý jáne sybailas jemqorlyqqa múldem tózbeýshilikti kórsetetin qundylyqtar júiesin saqtaý ári nyǵaitý, oqýshylardyń zań talaptaryn saqtaýǵa yntasyn qalyptastyrý zaman talabynan týyndap otyrǵan úrdis ekendigin atap ótti.
– Qurmetti taldyqorǵandyqtar, jerlester! Qadirmendi áriptester! Búgin sizderdiń bárińiz maǵan áriptes esebindesizder. Bolashaqta sybailas jemqorlyqqa «Joq!» deitin azamattardyń qatary búgingi kúni kóbeiip kele jatyr. Búgingi jiynǵa shaqyrylǵandar sonyń kýágeri! – degen Serikbai Órikbaiuly elimizdegi sybailas jemqorlyqpen kúresti júrgizý tetikterin Elbasy Nursultan Ábishuly Nazarbaevtyń jyl saiynǵy Joldaýlarynda erekshe atap ótetindigine toqtaldy. – Sol úshin biz bolashaqqa tek adal urpaq tárbielep, biliktiń biik tarmaqtarynda eńbek etýine yqpal etýimiz kerek. Adal azamattarǵa qashanda jol ashyq. Sondyqtan búgin bárińiz oblys ákiminiń kabinetin, ashylaiyn dep jatqan kórme pavilonyn kórdińizder. Al, myna sahna oblysymyzdaǵy nómiri 1-shi sahna. Munda elimizdiń estrada ánshileri, teatr qairatkerleri, saiasat maitalmandary úlken-úlken jiyndar ótkizedi. Mine, osyndai biik minber búgin sizderge berilip otyr. Osydan-aq sizderge degen qoshemettiń salmaǵyn sezinýge bolady. Óitkeni, biz sizderge úmit artyp otyrmyz. Qazaqstan bolashaqta «Jemqorlyqqa jol joq!» uranymen sybailastyqty qabyldamaityn, paraqorlyqqa múlde tózbeitin mádenietti qalyptastyratyn el bolady. Ol sizderge bailanysty. Keleshekke aq júrekpen, shynaiy senimmen, qarymdy qabiletpen, adamdyq qasietterińizben, tereń bilimderińizben, qajyrly eńbekqorlyqtaryńyzben qadam basyp, Táýelsiz elimizdiń, memleketimizdiń Týyn biik ustaityn azamat bolýlaryńyz kerek.
Sletke daiyndalyp kelgen komandalar ózderiniń ónerin kórsetip, túrli nominatsiialar boiynsha baq synasty. Osyǵan orai oblystyq quzyrly organdardyń basshylarynan quralǵan komissiia ózderiniń baǵasyn berip, úzdik komandalardy iriktedi. Sonymen «Úzdik klýb» atalymyn Raiymbek aýdanynyń oqýshylary jeńip alsa, «Úzdik kóshbasshy» atalymyn Qaratal aýdany, «Úzdik spiker» atalymyn Taldyqorǵan qalasy, «Úzdik qoiylym» atalymyn Kerbulaq aýdany, «Úzdik án» atalymyn Sarqan aýdany, «Úzdik emblema» atalymyn Talǵar aýdany, «Úzdik uran» atalymyn Uiǵyr aýdany, «Úzdik prezentatsiia» atalymyn Panfilov aýdany, «Úzdik kórnekilik materialdar» atalymyn Tekeli qalasy, «Úzdik beinebaian» atalymyn Eńbekshiqazaq aýdany, «Eń úzdik kiim úlgisi» atalymyn Ile aýdany, «Kórermender kózaiymy» atalymyn Jambyl aýdany, «Belsendi klýb» atalymyn Aqsý aýdany, «Bilimdi klýb» atalymyn Qarasai aýdany, «Jigerli klýb» atalymyn Eskeldi aýdany, «Tapqyr klýb» atalymyn Balqash aýdany, «Almaty oblysy ákiminiń nominatsiiasy» atalymyn Alakól aýdany, «Úzdik ideologiialyq jumys» atalymyn Qapshaǵai qalasy, «Bolashaqtyń úmiti» atalymyn Kóksý aýdany ielendi. Barlyq jeńimpazdar baǵaly syilyqtarmen marapattaldy. Sondai-aq, «Adal urpaq» eriktiler klýbynyń qataryna músheler qabyldandy. Búgingi kúni oblystaǵy 743 «Adal urpaq» klýbyna 158 myń 201 oqýshy múshe bolyp otyr.
Mádi ALJANBAI
