Aýyldarda jumys isteýge jas meditsina mamandaryn jappai tartý qajet. Bul týraly búgin Úkimet otyrysynda QR Premer-Ministri Asqar Mamin aitty, dep habarlaidy QazAqparat.
«Memleket basshysy Qasym-Jomart Kemeluly Toqaevtyń halyqqa Joldaýynda Úkimetke meditsinalyq alǵashqy kómekti uiymdastyrýdyń tásilderin túbegeili qaita qaraýdy tapsyrdy. Halyqtyń basym kópshiligine, ásirese aýyldy jerlerde mobildilik pen qoljetimdilik asa qajet. Bul mindetter «Nur Otan» partiiasynyń baǵdarlamasyn oryndaý jónindegi jol kartasynda belgilengen», - dedi Úkimet basshysy.
Sondyqtan Premer-Ministr alǵashqy kómekti jańartý men oǵan halyqtyń qoljetimdiligin keńeitý boiynsha barlyq qajetti sharalardy qabyldaý kerektigin basa aitty.
«Qazirgi ýaqytta ambýlatoriialyq emhana obektileri ǵimarattarynyń eń joǵary tozýy men eń tómen tehnikalyq jaraqtandyrýy Aqmola, Soltústik Qazaqstan jáne Shyǵys Qazaqstan oblystarynda baiqalady. Aýyldarda jumys isteýge jas meditsina mamandaryn jappai tartý, olardy yntalandyrý qajet ekenin atap ótkim keledi. Ásirese Túrkistan, Aqtóbe oblystarynda jas kadrlardy materialdyq yntalandyrý jumysy jetkiliksiz júrgizilýde. Bul baǵytta Qostanai, Soltústik Qazaqstan jáne Atyraý oblystarynyń jas mamandardy áleýmettik qoldaýdaǵy tájiribesin paidalaný kerek», - dedi Asqar Mamin.
Onyń atap ótýinshe, respýblikada 2025 jyldyń sońyna deiin 487 obektini salý josparlanǵan.
«Sonymen qatar, 600 astam alǵashqy meditsinalyq kómek kórsetý obektilerin kúrdeli jóndeýden ótkizý qajet. Qabyldanyp jatqan sharalar, ásirese aýyldyq eldi mekenderdi, alǵashqy meditsinalyq kómekpen qamtýdy edáýir keńeitýge múmkindik beredi. Jalpy Densaýlyq saqtaý ministrligi usynǵan tásilderdi maquldaýdy usynamyn», - dedi Úkimet basshysy.
