Astanadaǵy Ulttyq akademiialyq kitaphanada belgili túrik aqyny Júnis Emreniń óleńderiniń qazaq tilindegi jinaǵy tanystyryldy, dep habarlaidy QazAqparat.
Qazaqstan jazýshylar odaǵynyń Nur-Sultan qalasy filialy men Júnis Emre institýtynyń Qazaqstandaǵy ókildigi uiymdastyrǵan sharaǵa ziialy qaýym ókilderi, ǵalymdar men diplomattar qatysty.
Túrkiianyń Qazaqstandaǵy Tótenshe jáne Ókiletti Elshisi Ýfýk Ekidji igilikti iske muryndyq bolǵan adamdarǵa alǵys aityp, baýyrlas eldiń atynan rizashylyq bildirdi.
«Búgin Júnis Emre institýtynyń Qazaqstan Jazýshylar odaǵymen birge atqarǵan jemisti jumysynyń nátijesi retinde aqynnyń qazaqsha tańdamaly óleńder kitabyn tanystyrǵaly otyrmyz. 2 naýryz kúni eki baýyrlas eldiń arasynda diplomatiialyq qarym-qatynas ornaǵanyna 30 jyl toldy. Búgingi shara osyndai mańyzdy oqiǵaǵa sáikes kelip otyr. Aýdarmadaǵy negizgi kórkemdik róldi óz moinyna alǵan 19 qadirli qazaq aqynyn osy mańyzdy jobalarymen quttyqtaimyn», - dedi Elshi.
Qazaqstan Jazýshylar odaǵynyń Nur-Sultan qalasy filianyń direktory Dáýletkerei Kápulynyń aitýynsha, bul aýdarmaǵa kileń jas aqyndar atsalysqan.
«2021 jyl túrki dúniesine ortaq tulǵa Júnis Emre jyly bolǵanyn bilesizder. Shaiyrdyń jyrlaryn qazaq tiline buǵan deiin de úlken aqyndarymyz aýdarǵan. Nesipbek Aituly, Ulyqbek Esdáýlet aǵalarymyzdyń aýdarmalary bar. Biyl Halyqaralyq túrki akademiiasynyń qoldaýymen qazaqtyń kórnekti aqyny Svetqali Nurjanovtyń aýdarmasy oqyrmanǵa jol tartty. Bul qazaq aqyndary Júnis Emreni aýdarýdan jarysyp jatyr degen sóz emes. Júnis Emre institýtynyń Qazaqstandaǵy ókildigi bizben bailanysqa shyǵyp, Túrkiiadaǵy ǵalymdar iriktegen 72 óleńdi aýdarmaǵa usyndy. Iaǵni aýdarylatyn óleńderdi aýdarmashylar emes, Júnis Emre murasyn zerttep júrgen ǵalymdar tańdady. Bizde dástúr sabaqtastyǵy deitin dúnie bar. Sol rette bul jolǵy aýdarmaǵa úlken aýdarmashylarymyzdy qospai, jas aqyndardy tarttyq. Atap turyp aitsaq, Qazaqstan jazýshylar odaǵynyń Nur-Sultan qalalyq filialyndaǵy odaq músheleri, eldiń ár óńirinde ádebietke ózindik únderimen kelgen jas daryn ieleri aýdarmaǵa atsalysty. Bir jaǵynan aýdarma aqyndy shynyqtyrady, ekinshi jaǵynan shyǵarmashylyq izdeniske itermeleidi. Mine sondyqtan jas aqyndardy tarttyq», - deidi Jazýshylar odaǵynyń ókili.
Aýdarma jinaǵy 1000 danamen basylypty. Onyń negizgi bóligi eldegi kitaphanalarǵa taratylmaq.
«Bizdiń keibir aqynymyz Júnis Emreni qazirgi túrik tilindegi nusqasynan aýdarǵan. Bul aýdarmanyń ereksheligi dep aitýǵa bolady, biz kóne túrki tilindegi nusqasymen salystyryp otyryp aýdardyq. Qazirgi túrik tili men eski túrki tiliniń arasynda paryq bar. Sol eski túrki tilinen áýeli qazirgi túrik tiline túsirip, sodan qazaqsha jolma-jol aýdarma jasaldy. Osy taraptan kelgende aqyndar aýdarmaǵa qatty qinaldy deýge kelmeidi.
Jazýshylar odaǵynyń bastamasymen Ázerbaijan halqynyń qazirgi zamandaǵy poeziiasynyń antologiiasyn aýdarǵanbyz. Eshqandai qalamaqysyz, aqyndardyń júrek qalaýymen atqaryldy bul sharýa. Endi osy jolmen iakýt-saha poeziiasynyń antologiiasyn aýdaryp jatyrmyz», - dedi Dáýetkerei Kápuly.
Shara sońynda aýdarma jumysyna belsendi atsalysqan aqyndar men uiymdastyrýshylarǵa Túrkiia elshiligi men Júnis Emre institýtynyń atynan estelik syilyqtar tabystaldy.
