Foto: gov.kz
Túrkistan oblysynda jarysqa jolǵa shyqqan jasóspirimder jol apatynan kóz jumdy. Qaiǵyly oqiǵa 22 sáýir kúni Arys–Shardara tasjolynda bolǵan, dep habarlaidy oblystyq politsiia departamenti.
Aldyn ala málimetke sáikes, «Chevrolet Cobalt» pen «KamAZ» soqtyǵysqan. Saldarynan jeńil kólikte otyrǵan úsh jasóspirim oqiǵa ornynda qaitys boldy.
Kólikti basqarǵan júrgizýshi men taǵy bir jolaýshy aýrýhanaǵa jetkizildi. Al júk kóliginiń júrgizýshisi ýaqytsha ustaý izoliatoryna qamaldy.
Belgili bolǵandai, kólikte jattyqtyrýshy jáne kámeletke tolmaǵan sportshylar bolǵan. Olar Túrkistan qalasyna jarysqa bara jatqan. Alaida balalardy tasymaldaý týraly tiisti organdarǵa aldyn ala habar berilmegen.
Qazir jol apatynyń barlyq mán-jaiy anyqtalyp jatyr. Sonymen qatar balalardyń qaýipsizdigin qamtamasyz etý mindetin tiisinshe oryndamaý deregi boiynsha sotqa deiingi tergeý bastaldy.
